मोरङको पथरी शनिश्चरेमा आफ्नै आमाको हत्या गरेको आरोपमा एक व्यक्ति पक्राउ परेका छन् । 

माघ १२ गते घरायसी विवाद हुँदा पथरी शनिश्चरे नगरपालिका–२ का ४८ वर्षीय कमल श्रेष्ठले आफ्नै आमा ९० वर्षीय जयमाया श्रेष्ठको हत्या गरेको प्रहरीले जनाएको छ । 

जग्गा विवादमा हत्या गरेको प्रहरीको अनुसन्धानबाट खुलेको छ । 

प्रमाण नष्ट गर्नका लागि पथरी शनिश्चरेको हरियाली सामुदायिक वनमा रहेको समाधिस्थल घाटमा कमलले एक्लै शव ल्याएर जलाएको जिल्ला प्रहरी कार्यालय मोरङका प्रवक्ता दीपक श्रेष्ठले बताए । 

आमा हराएको भन्दै कमलका दाइले इलाका प्रहरी कार्यालय पथरीमा उजुरी दिएका थिए । कमललाई प्रहरीले माघ १७ गते नियन्त्रणमा लिएको थियो । 

कर्तव्य ज्यान मुद्दामा १० दिन म्याद थप गरी अनुसन्धान अगाडि बढाइएको प्रहरीले जनाएको छ ।