नेपाली कांग्रेसका महामन्त्री विश्वप्रकाश शर्माले पार्टीको केन्द्रीय कार्यसम्पादन समितिको बैठकमा सरकारको कामको समीक्षा हुने बताएका छन् । महामन्त्री शर्माले पार्टीको अब बस्ने केन्द्रीय कार्यसम्पादन समितिको बैठकमा सरकारको कामको समीक्षा गर्दै दिशानिर्देश गर्ने बताएका हुन् । 

कार्यसम्पादन समितिको बैठकले सरकारको कामलाई अझ सुधार गर्दै गति बढाउनका लागि निर्देशन दिने उनले बताए । जनताको जनजीवनसँग प्रत्यक्ष सरोकार राख्ने विषयहरूमा सरकारलाई ध्यानाकर्षण गराउने उनले उल्लेख गरे । 

कोभिड–१९ विरुद्धको खोप अभियानलाई महाअभियानकै रुपमा सञ्चालन गर्नका लागि पनि सरकारलाई घच्घचाउने उनको भनाइ छ । त्यस्तै कार्यसम्पादन समितिको बैठकले पार्टीको सबै तहलाई व्यवस्थित बनाउने र पार्टीका विभागहरू बनाउने दिशातर्फ अघि बढ्ने पनि महामन्त्री शर्माले बताए । 

‘हामीलाई जनताले म्याण्डेड बाहिर बस्न भनेर दिँदादिँदै पनि नचाहँदा, नचाहँदै पनि सरकारको नेतृत्व गरेर जानुपर्‍यो,’ उनले भने, ‘ त्यसकारण यो सरकारलाई संविधानअनुसार चल्ने, संविधान र संसदको रक्षा गरेर जाने सवालमा, महामारीबाट जनताको जीवन रक्षा गर्नको लागि सरकार कति गम्भीर भएर जान्छ भन्ने सवाल र निर्वाचन सम्पन्न गराउने राष्ट्रिय दायित्व पूरा गर्ने सन्दर्भमा सरकारलाई हेरिदिनुस्, समीक्षा गरिदिनुस् भन्छौँ पनि ।’

महामन्त्री शर्माले वर्तमान शेरबहादुर देउवा नेतृत्वको सरकार विशिष्ट परिस्थितिमा बनेको भन्दै जनताका सबै अपेक्षाहरू पूरा हुन नसक्ने पनि बताए । 

केन्द्रीय कार्यसम्पादन समितिले भातृ तथा शुभेच्छुक संस्थाहरूको महाधिवेशनको सम्बन्धमा पनि टुंगोमा पुर्‍याउने उनले बताए । 

‘केन्द्रीय कार्यसम्पादन समितिले केही निर्णय, केही सम्बोधन गर्नुपर्ने, केही व्यवस्थापन गर्नुपर्ने र केही नयाँ खालका सांगठानिक परियोजनाको बारेमा दृष्टिकोण बनाएर जिम्मेवारीहरू बाँडफाँट गरेर जानुपर्ने अवस्था छ,’ उनले भने, ‘अहिले हामी दुईवटा महामन्त्री भातृ र शुभेच्छुक संस्थाहरूको सन्दर्भमा केही वर्कआउट पनि गरिरहेका छौँ । कार्यसम्पादन समितिको बैठक बसिसकेपछि देशभर नै कार्यसम्पादन समिति बनाउने क्रम शुरू हुन्छ । सबै तहमा कार्यसम्पादन समितिहरू गठन हुन्छन् ।’

कांग्रेसको यसअघि भर्चुअल रुपमा बसेको केन्द्रीय कार्यसमिति बैठकले ३७ सदस्यीय केन्द्रीय कार्यसम्पादन समिति गठन गरेको थियो ।