उखुबारी हत्या प्रकरणमा मोरङ प्रहरीले थप दुई जनालाई पक्राउ गरेको छ । अहिले उनीहरूसँग सोधपुछ भइरहेको प्रहरी प्रवक्ता डीएसपी दीपक श्रेष्ठले जानकारी दिए । अनुसन्धानकै क्रममा रहेकाले प्रहरीले नाम भने खुलाएको छैन । 

यसअघि प्रहरीले सिरहा नगरपालिका– २१ घर भई काठमाडौंको बल्खु बस्दै आएका ३१ वर्षीय अनिल मण्डल, मोरङको जहदा गाउँपालिका–४ सिस्बनीका २९ वर्षीय अमित भन्ने दिनानाथ साह र धनपालथान गाउँपालिका– ७ कमलपुर पश्चिमटोलका ६२ वर्षीय नासिर आलमलाई पक्राउ गरी सार्वजनिक गरेको थियो । 

जग्गा कारोबारको कमिसनमा कुरा नमिल्दा ३ जनाको हत्या भएको रहस्य खुलेको छ । 

मोरङको धनपालथान गाउँपालिका–७ स्थित उखुबारीमा माघ १२ र १३ गते प्रहरीले २ जनाको शव उत्खनन गरेर निकालेको थियो ।

यो पनि पढ्नुहोस्

उखुबारी हत्या प्रकरणः जग्गाको कमिसन एक्लै हत्याउन योजना बनाएर ३ साझेदारको हत्या

उखुबारीबाट माघ १२ गते सप्तरीको शम्भुनाथ नगरपालिका– ४ का ३२ वर्षीय शम्भुकुमार चौधरी र माघ १३ गते सुनसरीको धरान उपमहानगरपालिका– ३ घर भई भक्तपुर बस्दै आएका ४८ वर्षीय राजेन्द्रकुमार श्रेष्ठको शव भेटिएको थियो ।

माघ २० गते ललितपुरको गोदावरी नगरपालिका– १२ बाट तेह्रथुमका ६३ वर्षीय मोहन लिम्बूको शव उत्खनन् गरेर निकालिएको थियो । 

घरजग्गाको कारोवार गर्दै आएका उनीहरूबीच कमिसनको विषयमा विवाद हुँदा हत्या गरेको खुल्न आएको प्रहरीले जनाएको छ ।