प्रधानमन्त्री एवं नेपाली कांग्रेस संसदीय दलका नेता शेरबहादुर देउवाले अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्ट (एमसीसी) जतिसक्दो छिटो संसदबाट अनुमोदन हुने बताएका छन् ।

एमसीसीबारे बाहिर भ्रम फैलाइएकाले त्यसको प्रतिवाद गर्न उनले आग्रह गरे । 

संसद भवन नयाँ बानेश्वरमा मंगलवार बसेको कांग्रेस संसदीय दलको बैठकलाई सम्बोधन गर्दै देउवाले एमसीसी राष्ट्रहितमा रहेकोले पारित गर्नुपर्ने बताएका हुन् । 

भोलि नै संसदमा एमसीसी टेबल गर्नु तयारी रहेको भन्दै देउवाले यसको पक्षमा बोल्न सांसदहरूलाई निर्देशन दिए । 

‘सक्दो छिटो एमसीसी टेबल गराउँछौं, तपाईंहरूले यसबारेका भ्रम निवारण गर्नु पर्‍यो,’ देउवाको भनाइ उद्धृत गर्दै कांग्रेस सांसद रंगमति शाहीले लोकान्तरसँग भनिन् । 

देउवाले एमसीसी पूर्ववर्ती केपी शर्मा ओली सरकारले संसदमा दर्ता गराएको र सो प्रस्ताव पारित गर्नु एमालेको पनि दायित्व रहेको बताएका थिए । उनले एमालेका प्रमुख सचेतकले एमसीसी पारित गर्ने षड्यन्त्र भएको भनेर दिएको प्रतिक्रिया आश्चर्यलाग्दो रहेको बताए ।

बैठकमा पूर्वअर्थमन्त्री डा. रामशरण महतले एमसीसीका प्रावधानबारे जानकारी गराउँदै राष्ट्रहितको पक्षमा रहेको बताएका थिए । उनले एमसीसीको अनुदान कुनै हालतमा फर्किन दिन नहुने बताएका थिए । 

मंगलवारको बैठकमा महामन्त्री गगन थापा, संजय गौतम, देव तिमल्सिना, प्रकाश रसाइली लगायतले बोलेका थिए । कांग्रेस कार्यसम्पादन समितिको बैठक पनि मंगलवार दिउँसो बस्दै छ । 

सोमवारको सर्वदलीय बैठकमा सभामुख अग्नि सापकोटाले आफू अम्पायरको भूमिकामा रहेकोले दलहरूबीच सहमति भएर आउने कुनै प्रस्ताव नरोक्ने बताएका थिए । प्रतिनिधि सभाको बैठक शुक्रवार दिउँसो १ बजे बस्दैछ ।