साताको पहिलो दिन आइतवार शेयर बजार मापक परिसूचक नेप्से ३९.४० अंकले घटेको छ । 

नेप्से आइतवार १.४४ प्रतिशतले घट्दा बजार २६९३.१० बिन्दुमा ओर्लिएको हो । बजार घटेको भए पनि युनाइटेड आईडीआई मार्दी आरबी हाइड्रोपावरको शेयर मूल्यमा भने सकारात्मक सर्किट लागेको छ । यसका लगानीकर्ताले आइतवार १० प्रतिशतले कमाएका छन् ।

आइतवार बजार घटेको दिन तनहुँ पावर, सामलिङ पावर, नेपाल फाइनान्स, जीवन विकास लघुवित्त वित्तीय संस्थासहितका लगानीकर्ताले कमाए ।

जीवन विकासले ७३.६८ प्रतिशत बोनस दिने भएपछि लगानीकर्ता यसको शेयरमा झुम्मिएका छन् । यसको आज एक लाख ११ हजार ३४४ कित्ता शेयरको ४ हजार ७४० पटक कारोबार भएको छ । 

यसबाट ५८ करोड रूपैयाँको शेयर कारोबार भएको छ । जीवन विकासको सबै भन्दा बढी पटक कारोबार हुने र सबैभन्दा बढी रकमको कारोबार आइतवार भएको छ ।

बजार घटेको दिन नारायणी डेभलपमेन्ट बैंक, युनाइटेड इस्योरेन्स कम्पनी, रुरु जलविद्युत, प्रिमियर इन्स्योरेन्सहितका कम्पनीले भने ३ प्रतिशत भन्दा बढीले गुमाएका छन् ।

सबैभन्दा बढी कित्ता शेयर कारोबार गर्नेमा भने अपि पावर कम्पनी परेको छ । यसको ३ लाख २१ हजार ८३० कित्ता शेयरको कारोबार भएको छ ।

आइतवार बजारमा २३० कम्पनीको ७१ लाख २२ हजार कित्ता शेयरको ५७ हजार पटक कारोबार भएको छ । यसबाट चार अर्ब आठ करोड रूपैयाँको कारोबार भने आइतवार भएको छ ।