फोन पे नेटवर्क र भिसाबीच सहकार्य भएको छ । दुवै नेटवर्कबीच नगदरहित भुक्तानी गर्ने गरी भएको सहकार्यले जो सुकै नागरिकले जहाँ पुगेर पनि भुक्तानी गर्न सकिने भएको छ । 

यो सम्झौतापछि अब विदेशी नागरिकले सहजै फोनपेको क्यूआर स्क्यान गरी भुक्तानी गर्न सक्नेछन् । 

सम्झौतासँगै अब भिसा नेटवर्कमा जोडिएका पर्यटकले नेपालमा क्यूआर कोडबाट वित्तीय कारोबार गर्न पाउने छन् । फोनपे नेटवर्कले भिसासँगको सहकार्यमा क्यूआर भुक्तानीलाई विदेशी पर्यटकको पहुँचमा सेवा दिइने भएको छ ।

यो सेवा लिन भिसा इनेबल भएको बैंकिङ एप आवश्यक पर्ने जनाइएको छ । भिसा नेटवर्कको एमभिसा एप प्रयोग गरेर भुक्तानी गर्न सकिने फोन पेका सहायक सीईओ दिवस पोखरेलले बताए ।

नेपाली बैंकहरूको आफ्नो मोबाइल बैंकिङ एपमा भिसा इनेबल गरेर फोनपे नेटवर्कले सपोर्ट गर्ने बनाएपछि यस्तो सुविधा लिन सकिने भएको छ । फोनपेले यस्तो सेवा नबिल बैैंकबाट शुरू गरेको छ । 

यो सुविधासँगै भिसा नेटवर्क प्रयोगकर्ताले जोसुकैले गाउँदेखि शहरसम्म नै सेवा लिन सक्ने भएका छन् । स्मार्ट फोनको प्रयोग र क्युआर स्क्यान सहजै हुँदै गइरहेकोले पनि भिसासँगको सहकार्यमा भएको यो सेवा समग्र डिजिटल बैंकिङकै लागि कोशेढुं्गा हुने उल्लेख छ । 

कार्यक्रममा नबिल बैंकका सीईओ अनिल शाहले अब हरेक नेपालीको गोजीमा पैसा आउने माध्यम नै भिसा भएको बताए । फोनपे भिसाको सहकार्यले गाउँगाउँ पुगेर कारोबार गर्न सकिने भएको छ । यसले नगद र कार्ड बोक्नुपर्ने झन्झटलाई पनि मुक्ति दिएको शाहले बताए । 

कार्यक्रममा नेपाल राष्ट्र बैंकका भुक्तानी प्रणाली विभागका कार्यकारी निर्देशक गुरुप्रसाद पौडेलले फोन पे र भिसा नेटवर्कबीचको एकीकृत सेवाले डिजिटल सेवालाई प्रवद्र्धन गर्ने बताए । उनले भने ‘अहिले क्युआरमा आधारित भुक्तानी प्रणालीमा नयाँ प्रविधि र सेवाले डिजिटल अर्थतन्त्रलाई नै बढावा दिने छ ।’