नेकपा (एस) का ‘सम्मानित’ नेता झलनाथ खनालले आफूलाई हराउन कांग्रेस–एमाले लागेको दाबी गरेका छन् । 

शनिवार पार्टीको इलाम–काठमाडौं सम्पर्क मञ्चको भेलालाई सम्बोधन गर्दै उनले चुनावमा कांग्रेस–एमाले बोरामा पैसा बोकेर जाने र पहिलो नम्बरमा आफूलाई हराउन खेल भइरहेको दाबी गरेका हुन् । 

‘कांग्रेस त बोरामै पैसा बोकेर आउँछ, उनीहरूको चरित्र पनि त्यस्तै हो । हामी सबै जित्छौं भन्याछन् नि कांग्रेसहरूले, त्यही पैसा हो,’ उनले भने, ‘प्रधानमन्त्री शेरबहादुर देउवाले भने गठबन्धनलाई सँगै लिएर जानुपर्छ है भन्नु भएको छ ।’

नेता खनालले आफूलाई हराउन एमालेले अध्यक्ष केपी ओलीको उपस्थितिमा इलाम क्षेत्र नं. १ मा कार्यक्रम गर्न लागेको र कांग्रेसका केही नेताहरू पनि लागेको उनको भनाइ छ ।  

‘कांग्रेसका मान्छेहरूको बैठक भयो, जो गठबन्धनमा एकता चाहँदैनन्,’ उनले भने, ‘बैठकमा को मान्छेलाई हराउने भन्दा पहिलो नम्बरमा झलनाथ खनाल पर्‍यो ।’