मनहरी बस दुर्घटनामा २ जनाको मृत्यु, १५ घाइते

मकवानपुरको मनहरीमा शुक्रवार बिहान भएको बस दुर्घटनामा दुई जनाकाे मृत्यु भएकाे छ ।

मृत्यु हुनेमा बसका सहचालक नुवाकोटको तारकेश्वर गाउँपालिका-४ घर भएका २२ वर्षीय सुवास श्रेष्ठ र बसमा सवार सोही ठाउँका २९ वर्षीय शम्भु दराई रहेको इलाका प्रहरी कार्यालय मनहरीका प्रहरी निरीक्षक प्रकाश थापाले जानकारी दिए । 

दुर्घटनामा घाइते हुनेको संख्या १५ पुगेको छ । हेटौंडाबाट चितवनतर्फ जाँदै गरेको बा ४ ख ४४५४ नम्बरको यात्रुवाहक बस पूर्वपश्चिम राजमार्गअन्तर्गत मनहरी गाउँपालिका-६ सुनाचुरी भुल चोकमा अनियन्त्रित भई पल्टिएको थियो । 

दुर्घटनामा घाइते भएकाहरूलाई उपचारका लागि चितवन पठाइएको उनले बताए । घाइतेमध्ये केहीको अवस्था गम्भीर छ ।

बसमा कति यात्रु थिए भन्ने यकिन भइनसकेको प्रहरी निरीक्षक थापाले बताए । बसका चालकलाई नियन्त्रणमा लिएर घटनाबारे अनुसन्धान गरिरहेको उनको भनाइ छ ।