यी व्यक्तिहरूले सीमा नाका र विमानस्थलमा कोरोना परीक्षण गर्नुपर्ने

स्वास्थ्य मन्त्रालयले सीमा नाका र त्रिभुवन अन्तर्राष्ट्रिय विमानस्थलमा रहेका हेल्थ डेस्कमा कोभिड-१९ परीक्षण गराउनुपर्ने अवस्थाहरूबारे सूचना जारी गरेको छ । 

मन्त्रालयअन्तर्गतको स्वास्थ्य आपतकालीन कार्यसञ्चालन केन्द्रका अनुसार पूर्ण खोप प्राप्त नगरेका वा ७२ घण्टाभित्र कोरोना परीक्षण रिपोर्ट नेगेटिभ नभएका यात्रीहरूले कोरोना परीक्षण गराउनुपर्नेछ । 

त्यस्तै पूर्ण खोप प्राप्त गरेको र परीक्षण रिपोर्ट नेगेटिभ भए पनि संक्रमणको लक्षण भएका यात्रीहरूले पनि कोरोना परीक्षण गराउनुपर्नेछ । ‘५ वर्षमाथिका बालबालिकाहरू जसले पूर्ण खोप प्राप्त गरेका छैनन् वा जसको ७२ घण्टाभित्रको कोभिड–१९ परीक्षणको नेगेटिभ रिपोर्ट छैन वा दुवैमध्ये कुनै एउटा भए पनि कोभिड-१९ सँग मिल्दाजुल्दा लक्षण छन् भने परीक्षण गराउनुपर्ने’ सूचनामा उल्लेख छ । 

साथै सीमानाका वा हवाई नाकामा खटिएका स्वास्थ्यकर्मीहरूले आवश्यक ठानेमा कोरोना परीक्षणलगायत अन्य संक्रामक रोगहरूको समेत परीक्षण गर्न सक्ने मन्त्रालयले जनाएको छ ।