वाणिज्य बैंकहरूले चैतको दोस्रो सातासम्मको निक्षेप संकलनमा दुई अर्बले सुधार गरेका छन् । 

वाणिज्य बैंकहरूको छाता संगठन नेपाल बैंकर्स एशोसिएसनले सार्वजनिक गरेको १२ चैतसम्मको तथ्यांकअनुसार बैंकहरूमा ४ चैतको तुलनामा जम्मा दुई अर्बले मात्रै निक्षेप बढेको हो । यो अवधिसम्ममा वाणिज्य बैंकहरूको कर्जा प्रवाह पनि दुई अर्ब रूपैयाँले नै बढेको छ । 

वाणिज्य बैंकहरूमा चैत १२ सम्म आइपुग्दा निक्षेप संकलन ४३ खर्ब ३० अर्ब रूपैयाँ पुगेको छ भने कर्जा प्रवाह ४१ खर्ब ७० अर्ब रूपैयाँ पुगेको पनि तथ्यांकले देखाएको छ । 

बैंकहरूमा फागुन मसान्तमा जम्मा भएको निक्षेपको तुलनामा भने अझै तीन अर्ब रूपैयाँ निक्षेप र दुई अर्ब रूपैयाँ कर्जा प्रवाहमा कमी आएको छ । 

फागुन मसान्तमा वाणिज्य बैंकहरूमा ४३ खर्ब ३३ अर्ब रूपैयाँ निक्षेप संकलन थियो । यो अवधिमा कर्जा प्रवाह ४१ खर्ब ७२ अर्ब रूपैयाँ रहेको पनि बैंकर्स संघले सार्वजनिक गरेको तथ्यांकले देखिएको छ ।