राप्रपा नेपालका अध्यक्ष कमल थापाले अब राजा फर्किने सम्भावना सकिएको बताएका छन् ।

पुरानो पार्टी राप्रपाका नेता–कार्यकर्तालाई नयाँ वर्षको शुभकामना दिँदै अध्यक्ष थापाले २–४ प्रतिशत भोटको जगमा राप्रपा ठूलो नहुने बताए ।

सामाजिक सञ्जाल ट्विटरमा लेख्दै थापाले भनेका छन्, ‘नयाँ वर्षको अवसरमा मेरो पुरानो पार्टी र साथीहरूलाई शुभकामना ! राष्ट्रिय प्रजातन्त्र पार्टी र सो पार्टीका नेताहरूसँग मेरो गुनासो, वैमनस्यता छैन । तपाईंहरूको धैर्यता रहुञ्जेल राजा बोक्नोस्, मेरो शुभकामना छ । विभिन्न कारणवश मैले राजाको एजेण्डा छोडें । तितो लाग्ला, अब राजा फर्कने सम्भावना सकियो ।’

असम्भव एजेन्डा बोकेर नयाँ पिँढीलाई भ्रममा पार्न नहुने समेत उनले बताए । ‘पार्टीहरू असफल भएर राजा आउने होइन । एउटा पार्टी असफल भए अर्को आउँछ । राजा फर्कने अरु नै कारण थिए । राजाले नै त्यो बाटो बन्द गरिदिए । अब असम्भव एजेण्डा बोकेर नयाँ पिँढीलाई भ्रममा पार्नु हुँदैन । असम्भव एजेण्डा बोकेर हिन्दूराष्ट्रलाई बन्धक बनाउन हुँदैन । २–३ प्रतिशत भोटको जगमा राप्रपा ठूलो हुँदैन,’ उनले लेखेका छन् ।

राप्रपा पनि अन्ततः आफ्नै बाटोमा आउने विश्वास समेत थापाले दिएका छन् । उनले अगाडि लेखेका छन्, ‘मलाई थाहा छ, अन्ततः तपाईंहरू मेरै बाटोमा आउनुपर्छ । अहिले गालीगलौज/आरोपहरू खेपेर भए पनि तपाईंहरूको लागि म बलियो घर बनाएर राखिदिनेछु । पहिले पनि मैले बनाएकै घरमा तपाईंहरू आएको हो । त्यहाँ अझै केही समय रमाइ राख्नोस् । राजाको माया त लाग्छ, त्यसैले राजसंस्थाप्रति मेरो सम्मान सदैव रहिरहने छ ।’