अदालतबाट जरिवाना ठहर भएका वली पक्राउ

नेपाल प्रहरीले उच्च अदालत पाटनबाट २३ लाख ६५ हजार ४३४ रुपैयाँ जरिवाना ठहर भएका १ जनालाई पक्राउ गरिएको छ ।

प्रहरीको केन्द्रीय अनुसन्धान ब्यूरो (सीआईबी) को टोलीले बैंकिङ कसुर मुद्दामा उच्च अदालत पाटनको विक्रम संवत् २०७८ फागुन १६ र १७ गतेको फैसलाअनुसार १२ दिन कैद सजाय र बिगो बमोजिम २३ लाख ६५ हजार ४३४ रुपैयाँ जरिवाना तोकेपछि फरार रहेका बर्दिया घर भई नयाँ बानेश्वर बस्दै आएका ३४ वर्षीय दिनेशभक्त वलीलाई बिहीवार पक्राउ गरिएको छ ।

ब्यूरोका प्रवक्ता, प्रहरी उपरीक्षक श्यामकुमार महतोले आफ्नो खातामा पर्याप्त मौज्दात रकम नभएको जानीजानी बैंकिङ कसूरजन्य अपराध गरेकाले वलीलाई बिहीवार ललितपुरको ग्वार्कोबाट पक्राउ गरिएको जानकारी दिए ।

पक्राउ परेका वलीले आफ्नो प्रभू बैंक लिमिटेड कोटेश्वर शाखा र एसबीआई बैंक लिमिटेड नयाँ बानेश्वर शाखाको पैसा नभएको चेक दिएर बैकिङ कसुरजन्य अपराध गरेका थिए । उनलाई फैसला कार्यान्वयनका लागि बिहीवार काठमाडौं जिल्ला अदालत पेश गरेको प्रवक्ता महतोले बताए ।