नेपाली कांग्रेस बागमती प्रदेशका सभापति इन्द्र बानियाँले पार्टी निर्णयविपरीत उम्मेदवार दिनेहरू कांग्रेस विरोधी भएको आरोप लगाएका छन् । एमालेलाई सहयोग गर्नेहरू कांग्रेस हुन नसक्ने उनले बताए । 

सत्ता गठबन्धनले शुक्रवार काठमाडौंमा आयोजना गरिएको चुनावी सभालाई सम्बोधन गर्दै बानियाँले संविधानको रक्षाको लागि बनेको गठबन्धनलाई सफल बनाउनु कांग्रेस कार्यकर्ताको जिम्मेवारी भएको बताएका हुन् । 

‘एमालेका कार्यकर्ताहरूले कांग्रेसले माओवादीलाई भोट हाल्दैनन् भनेर भ्रम सिर्जना गरेका छन्, माओवादी र कलमलाई भोट हालेर राष्ट्रिय सभा चुनावमा उम्मेदवार जितिसकेका छन्,’ बानियाँले भने, ‘गठबन्धनको विपक्षमा उभिने कांग्रेस होइनन्, एमालेलाई सहयोग गर्नेहरू कांग्रेस होइनन् ।’

बानियाँले गठबन्धनको यात्रा १० वर्षका लागि हुने दाबी गरे । ‘कांग्रेसले अरूलाई मत हाल्दैन भन्नेले कांग्रेस र गठबन्धनलाई कमजोर बनाएका छन्, यो गठबन्धन कम्तीमा १० वर्षका लागि जान्छ,’ बानियाँले भने ।