नवौं राष्ट्रिय खेलकुद प्रतियोगिताको तयारी तीव्र पारिएको छ ।

मन्त्रिपरिषद्को बैठकले जेठ २२–२८ गण्डकी प्रदेशमा प्रतियोगिता आयोजना गर्ने मिति तोकेपछि अहिले सरोकारवाला निकायहरू पनि तयारीमा व्यस्त छन् ।

अब १ महिना न्दा कमको समय रहेकाले प्रतियोगितामा सहभागी हुने ७ प्रदेश र ४ वटा विभागले आ–आफ्नै तरिकाले तयारी शुरू गरेका हुन् । कान्छो विभागको रुपमा गत आठौं राष्ट्रियबाट सहभागी भएको गैरआवासीय नेपाली संघ (एनआरएनए स्पोर्टस्)ले पनि तयारी तीव्र पारिएको एनआरएन स्पोर्टस् एकेडेमीका कार्यवाहक सदस्य सचिव धर्मराज गिरीले जानकारी दिए ।

उनले एनआरएनएले नवौं राष्ट्रिय खेलकुदमा सहभागिता जनाउने गरी तयारी भइरहेको र यस पटक राखेपले प्रस्ताव गरेका ३६ मध्ये १८ खेलमा सहभागी हुने बताएका छन् ।

आठौं राष्ट्रिय खेलकुदमा व्यक्तिगत इभेन्ट्समा मात्रै सहभागिता जनाएको एनआरएनएले यस पटक सामूहिक खेलमा पनि सहभागिता जनाउँदै छ । यो पटक फुटबल, भलिबल र क्रिकेटका साथै बास्केटबलको पनि टिम आउने जनाइएको छ ।

क्रिकेटको टिम इंग्ल्याण्ड (युके)बाट आउने छ । यसै गरी भलिबलको टिम अष्ट्रेलिया र यूकेबाट ल्याउने तयारी गरिएको छ भने बास्केटबलको टिम अष्ट्रेलियाबाट आउने छ । 

यस्तै फुटबल टिम ल्याउने जिम्मा हिमालयन फुटबल क्लब मलेसियाका अध्यक्ष सन्तोष कार्कीलाई दिएको र उनले अष्ट्रेलिया तथा मलेसियाबाट खेलाडी छनोट गराएर टिम बनाउने बुझिएको छ ।

एनआरएनएका कार्यकारी अध्यक्ष कुल आचार्यले पनि नवौं राष्ट्रिय खेलकुद प्रतियोगिताका लागि आफू निकै उत्साहित रहेको बताएका छन् । 

विदेशमा बसेका नेपालीहरूलाई नेपालसँग खेलकुदको माध्यमबाट जोड्न पाउँदा आफू उत्साहित रहेको र प्रतियोगितामा एनआरएनएको सक्रिय सहभागिता हुने भन्दै तयारीका लागि कुनै कसर बाँकी नराख्न निर्देशन पनि दिएका छन् । 

खेलकुदका लागि एनआरएनएका तीन जना उपाध्यक्षहरू हिमाल गुरुङ, राज रेग्मी र रोशन थापासहित संयोजकहरू अब्दुल बसिद र रविन्द्र खड्काले विभिन्न देशमा रहेका एनसीसीहरूसँग समन्वय गरिरहेको कार्यवाहक सदस्य सचिव गिरीले बताए ।