पछिल्लो समय लगातार घटिरहेको नेप्से परिसूचक मंगलवार भने ४४.१६ अंकले बढेर २३१३ बिन्दुमा पुगेको छ । 

२२ सय बिन्दुमा झरेको नेप्से पुनः बढ्न थाले पनि आजको कारोवार रकम भने जम्मा १ अर्ब ३५ करोड रुपैयाँको मात्रै छ । आज २२६ कम्पनीको ३३ लाख ३० हजार कित्ता शेयरको २६ हजार पटक कारोवार भएको छ । 

नेप्से बढेको दिन आज मंगलवार तीन वटा कम्पनी बरुण हाइड्रोपावर, न्यादी ग्रुप पावर कम्पनी र जाल्पा सामुदायिक लघुवित्त वित्तीय संस्थाको शेयर कारोवारमा सकारात्मक सर्किट लागेको छ । यी कम्पनीको शेयर मूल्य आज १०/१० प्रतिशतले बढेको छ । 

युनिभर्सल पावर कम्पनी, दिव्यश्वरी हाइड्रोपावर र नेशनल हाइड्रोपावर कम्पनीको शेयर मूल्य भने ९ प्रतिशत भन्दा बढीले बढेको छ । 

आज गुमाउनेमा नबिल समृद्धि फण्डको ४.८२ प्रतिशत छ । यसबाहेक उन्नति सहकार्य लघुवित्त वित्तीय संस्था लिमिटेड, नबिल डिबेञ्चर, एग्रिकल्चर बैंक डिबेञ्चर, गुराँस लघुवित्त वित्तीय संस्थासहितका कम्पनीको शेयर मूल्य भने १ देखि २.५२ प्रतिशतसम्मले घटेको छ । 

आज सबैभन्दा बढी न्यादी ग्रुप पावरको ९ करोड ९८ लाख रूपैयाँको शेयर कारोवार भएको छ । यसको आज सबैभन्दा बढी अर्थात् १ लाख ६२ हजार कित्ता शेयर किनबेच भएको छ । यस्तो शेयर १२ सय ७७ पटक किनबेच भएको छ ।