पाल्पा । पाल्पामा मोटरसाइकल दुर्घटना हुँदा एक जनाको मृत्यु भएको छ ।

तानसेन नगरपालिका –९ दमकडा बजारमा गएराति भएको मोटरसाइकल दुर्घटनामा एक जनाको मृत्यु भएको हो । 

दुर्घटनामा गम्भीर घाइते भएका तिनाउ गाउँपालिका – ५ मस्यामका २२ वर्षीय योगेश रास्कोटीको उपचारका क्रममा आइतवार मृत्यु भएको जिल्ला प्रहरी कार्यालय पाल्पाका प्रवक्ता प्रहरी नायव उपरीक्षक वीरेन्द्र थापाले जानकारी दिए । 

माथागढी गाउँपालिका ३ सराईबाट पाल्पा–बुटवल सडकखण्डअन्तर्गतको बाँस्टारीतर्फ आउँदै गरेको लु७७प २१३२ नम्बरको मोटरसाइकल गएराति साढे ११ बजेको समयमा अनियन्त्रित भई दुर्घटना भएको थियो । 

दुर्घटनामा मोटरसाइकल चालक तिनाउ पाउँपालिका –५ मस्यामका २४ वर्षीय जनक राना सामान्य घाइते भएका थिए भने मोटरसाइकल पछाडि सवार रास्कोटी गम्भीर घाइते भएका थिए । 

रास्कोटीलाई उपचारका लागि लुम्बिनी मेडिकल कलेज प्रभास ल्याइएकोमा आइतवार उपचारका क्रममा उनको मृत्यु भएको प्रहरीले जनाएको छ । प्रहरीका अनुसार दुर्घटनाबारे थप अनुसन्धान कार्य जारी छ ।