नेकपा एमालेका सांसद एवं पूर्वमन्त्री शेरबहादुर तामाङले सस्तोमा किनेर सञ्चिति गरेको पेट्रोल किन महँगोमा बेचिएको भनेर सरकारसँग जवाफ माग गरेका छन् । 

पेट्रोलियम पदार्थको मूल्यवृद्धि घटाउन माग गर्दै संसदमा जरुरी सार्वजनिक महत्त्वको प्रस्तावमाथिको छलफलमा भाग लिँदै तामाङले ६ महिनाअघि सस्तोमा किनेको पेट्रोल अहिले महँगोमा किन बेचियो भनेर सरकारको जवाफ माग गरेका हुन् । 

‘नाकाबन्दी भन्दा अगाडि हाम्रो स्टोरेज क्षमता ३ महिनालाई पुग्ने थियो, अहिले ६ महिना भएको भनिएको छ,’ तामाङले भने, ‘६ महिना अगाडि १०२ मा किनेको सस्तो तेल आज किन बेच्दैछ ? यसको जवाफ चाहिन्छ । ६ महिना अगाडि किनेको तेल १८० किन बिक्री गरेको ?’

तामाङले तेल उत्पादक मुलुकले भूपरिवेष्ठित देशलाई सहुलियत दिन्छु भनेको अवस्थामा त्यो पहल नगरेकोबारे सरकारको ध्यानाकर्षण गराए । ‘ओपेकबाट सीधै किन्न सकेमा एक तिहाइ सस्तो हुन सक्थ्यो ? यसतर्फ ध्यान जान्छ कि जाँदैन ?’

पूर्वमन्त्री तामाङले केरुङबाट पेट्रोलियम पाइपलाइन बनाएर दीर्घकालीन समाधान खोज्न माग गरे । ‘केरुङबाट पाइपलाइन बनाऔँ ५० प्रतिशत घटाउन सकिन्छ,’ उनले भने ।