होटल एशोसिएसन नेपाल (हान) का उपाध्यक्ष विनायक शाहले जलवायु परिवर्तनको असरलाई कम गर्न होटलमा प्लाष्टिकजन्य वस्तुको प्रयोग रोकेको बताएका छन् । 

शनिवार न्युज एजेन्सी नेपालसँगको कुराकानीमा उनले यस्तो बताएका हुन् । 

हानले जेठ १८ गतेबाट होटलमा प्लाष्टिकजन्य वस्तुको प्रयोग बन्द गर्ने अभियान सञ्चालन गरेको थियो । जलवायु परिवर्तनमा सबैभन्दा धेरै असर प्लाष्टिकको कारण भएको भन्दै उनले प्रदूषण घटाउने, जलवायु परिवर्तनको असरलाई कम गराउँदै जाने लक्ष्यका साथ अभियान थालेको बताए । उपाध्यक्ष शाहले जेठ १८ गतेबाट ‘नो टु प्लाष्टिक’ भन्ने नारासहित अभियान सञ्चालन गरेको बताए । 

उनले २०२४ सम्ममा होटलमा आउनेहरूलाई प्लाष्टिकजन्य वस्तु बेगर सेवा दिने काम सफल गर्ने लक्ष्य रहेको बताए । 

‘प्लाष्टिकभन्दा प्राकृतिक कुराहरू केही मात्रामा महँगो हुन्छ तर होटलहरूका लागि शुरुआती चरण हो यो, लङटर्ममा फाइदा हुन्छ,’ उनले भने, ‘शुरुमा ग्राहकलाई न्यूनतम हुनेसम्म के गर्न सक्छौँ त्यो गर्नेछौँ । सामानहरु बजारमा उपलब्ध छ । सेवा क्षेत्र भएकोले गुणस्तर सर्वोपरी नै हुन्छ । प्लाष्टिक फ्री सामानहरू पनि टेस्टेड, क्वालिटी सर्टिफिकेशन भएका हुन्छन् ।’