नेकपा एकीकृत समाजवादीले संघीय संसदको सदस्य नरहेका शेरबहादुर कुँवरलाई मन्त्री बनाउन सिफारिश गरेको छ । 

तनहुँमा कृष्णकुमार श्रेष्ठलाई फिर्ता बोलाएर उनको ठाउँमा अछामका कुँवरलाई मन्त्री बनाउन लागिएको हो । आइतवार बसेको नेकपा (एस)को सचिवालय बैठकले यसअघिका मन्त्रीलाई फिर्ता बोलाएर नयाँलाई सरकारमा पठाउन लागेको हो । 

मन्त्री बन्न लागेका मेटमणि चौधरी, भवानी खापुङ र जीवनराम श्रेष्ठ प्रतिनिधि सभा सदस्य हुन् । श्रममन्त्रीमा सिफारिश भएका कुँवर गत फागुन २१ सम्म राष्ट्रिय सभाको सदस्य थिए । 

संविधानको धारा ७८ मा संघीय सांसद नभएको व्यक्ति मन्त्री बनेमा ६ महिनाभित्र सांसद बन्नुपर्ने व्यवस्था छ । सांसद नरहेका गोविन्द बन्दी कोइराला पनि नेकपा (एस)बाटै कानूनमन्त्री बनेका छन् । 

मन्त्रीमा सिफारिश अछामका कुँवर नेकपा (एस)का सुदुरपश्चिम कमिटीका उपाध्यक्ष र केन्द्रीय सदस्य छन् । एसले उनलाई अछामबाट चुनाव लडाउने गृहकार्य गरेको छ । अछामबाट एमाले नेता भीम रावल चुनाव लड्दै आएका छन् । 

२०६४ सालमा प्रतिनिधि सभा चुनावमा कुँवर अछामको क्षेत्र नम्बर १ बाट प्रत्यक्ष निर्वाचित भएका थिए । त्यो बेला रावल समानुपातिकबाट संविधान सभा सदस्य बनेका थिए ।