मुख्यमन्त्री राजेन्द्र राईले १४ जना स्थानीय तहका जनप्रतिनिधिहरूलाई प्रदेश समन्वय परिषद्मा मनोनीत गरेका छन् ।

परिषद्मा विराटनगर महानगरपालिका (मोरङ)का प्रमुख नागेश कोइराला, सूर्योदय नगरपालिका (इलाम) प्रमुख रनबहादुर राई, ऐसेंलुखर्क गाउँपालिका (खोटाङ) अध्यक्ष गिरेन्द्रबहादुर राई, साल्पासिलिछो गाउँपालिका (भोजपुर) अध्यक्ष दौलथकुमार कलुङ राई, खिजिदेम्बा गाउँपालिका (ओखलढुंगा) अध्यक्ष गम्बु शेर्पा, उदयपुरगढी गाउँपालिका (उदयपुर) अध्यक्ष मानबहादुर केप्छाकी मगरलाई मनोनीत गरिएको छ । 

यस्तै इटहरी उपमहानगरपालिका (सुनसरी) उपप्रमुख संगीताकुमारी चौधरी, छथर जोरपाटी गाउँपालिका (धनकुटा) उपाध्यक्ष गीता गुरुङ, फाल्गुनन्द गाउँपालिका (पाँचथर) उपाध्यक्ष सविता राई र मेरिङदेन गाउँपालिका (ताप्लेजुङ) उपाध्यक्ष दुर्गाप्रसाद श्रेङ चङवाङ सदस्य मनोनीत भएका हुन् । 

परिषद्मा हरेक जिल्लाबाट एक जना हुने गरी स्थानीय तहका प्रमुख वा उपप्रमुख वा जिल्ला समन्वय समितिका प्रमुख वा उपप्रमुखमध्येबाट कम्तीमा एक तिहाइ महिलाको प्रतिनिधित्वसहित १४ जना सदस्य मुख्यमन्त्रीले मनोनीत गर्ने कानूनी प्रावधान छ । 

परिषद्मा आर्थिक मामिला तथा योजना र आन्तरिक मामिला तथा कानून मन्त्री पदेन सदस्य रहने प्रावधान छ ।

मनोनीत गर्दा एक स्वतन्त्रबाट जितेका जनप्रतिनिधिलाई पनि मनोनित गरिएको छ । 

भोजपुरका अध्यक्ष दौलथकुमार कलुङ राई स्वतन्त्रबाट जितेका हुन् । मनोनीत भएकामध्ये १ स्वतन्त्र दुई एमालेका छन् भने अन्य गठबन्धनका रहेका छन् । 

प्रदेश १ को मंगलवार बसेको प्रदेश समन्वय परिषद् बैठकले ‘बैठक सञ्चालन कार्यविधि, २०७९’ स्वीकृत गरेको छ । 

नयाँ कार्यविधि स्वीकृत भएसँगै यसअघिको प्रदेश समन्वय परिषद् (बैठक सञ्चालन) कार्यविधि, २०७५ खारेज भएको छ । 

यसअघि भने परिषदमा १४ जना मनोनीत गर्ने व्यवस्था भए पनि मनोनीत गरिएको थिएन । 

सबै पालिकाका प्रमुख उपप्रमुखलाई प्रदेश समन्वय परिषदमा सहभागी गराउने गरिएको थियो ।