जब सांसदलाई राति साढे ९ बजे नचिनेको नम्बरबाट फोन आयो...

नेकपा माओवादी केन्द्रका सांसद टेकबहादुर बस्नेतलाई नचिनेको नम्बरबाट फोन गरेर रासायनिक मल कहिले आउँछ भनेर प्रश्न गरिएको छ । 

बिहीवार बसेको प्रतिनिधि सभा बैठकको शून्य समयमा सांसद बस्नेतले आफूलाई राति नचिनेको नम्बरबाट फोन आएको बारे सुनाएका हुन् । 

‘सभामुख महोदय, हिजो राति ९ बजेर २६ मिनेटमा मलाई ९८४७९७९२४३ नम्बरबाट फोन आयो । सेभ नगरिएको फोनबाट नाम ठेगाना सोध्न खोजें । उहाँको नाम ठेगाना सोध्न खोज्दा उहाँले एकोहोरो बोल्नुभयो– यो वर्ष किसानलाई मल दिने होइन ? तपाईहरू संसदमा आरामसंग बसिरहने ? संसदमा कुरा उठाइरहने मात्र हो ? भन्नुभयो । मैले यो विषय संसदमा उठिरहेको छ, सरकार मल उपलव्ध गराउन गम्भीरतापूर्वक लागिरहेको छ भनें,’ सांसद बस्नेतले संसदमा भने, ‘उहाँले थप्नुभयो, अरु सबै तपाईको कुरा मान्छु, मान्दै आएको छु, समयमा किसानले मल पाएनन् भने मान्दिन भन्नुभयो’ । 

सल्यानबाट प्रत्यक्ष निर्वाचिन सांसद बस्नेतले यो विषय एकजनाको व्यक्तिगत मामिला मात्र नभएको भन्दै मलको विषयमा सरकारको ध्यानकर्षण गराए । 

संसदमा सांसदहरूले हरेक दिन मलको विषयमा सरकारसँग जवाफ मागिरहेका छन् ।