नेकपा एमालेका सांसद डा. विजय सुब्बाले निजगढ विमानस्थल रोक्ने सर्वोच्च अदालतको फैसला भारतको प्रभावमा परेर आएको आरोप लगाएका छन् । उनले अदालतको राष्ट्रघाती निर्णयको विपक्षमा बोल्नुपर्ने बताए ।

प्रतिनिधि सभा बैठकमा विनियोजन विधेयकअन्तर्गत प्रधानमन्त्री कार्यालयको शीर्षकमाथिको छलफलमा भाग लिँदै सांसद सुब्बाले सर्वोच्चको निर्णय कार्यान्वयन गरेर देशमा कुनै पनि विकास हुन नसक्ने बताएका हुन् । 

‘अदालतको फैसला आएको छ नि ! निजगढ विमानस्थल रद्द गर्ने अदालतको त्यो राष्ट्रघाती निर्णयको विपक्षमा बोल्नुपर्छ । हामीलाई एयर रुट नदिने मुलुक (भारत)को प्रभावमा परेर गरिएको यस्तो निर्णयलाई अदालतको फैसलाको नाममा मानिरहनु बेठीक हुन्छ,’ सुब्बाले भने, ‘यदि सर्वोच्चको यो निर्णय मान्ने हो भने राष्ट्रवादी निर्णय केही कार्यान्वयन हुँदैनन्, देशको हितकारी योजना अगाडि राख्दा मुद्दा पर्छ र अदालतले खारेज गर्छ ।’ 

निजगढ विमानस्थलको काम अगाडि नबढाउन सर्वोच्चका पाँच न्यायाधीशले दिएको आदेशको संसदमा विरोध हुँदै आएको छ ।