प्रदेश १ को नीति तथा कार्यक्रम बहुमतले पारित भएको छ । प्रदेश १ सरकारले पेश गरेको आर्थिक वर्ष २०७९/८० को नीति तथा कार्यक्रम प्रदेश सभाबाट बहुमतले पारित भएको हो ।

आइतवार बसेको प्रदेश सभा बैठकले नीति तथा कार्यक्रम पारित गरेको हो । सभामुख प्रदीपकुमार भण्डारीले कार्यक्रम बहुमतले पारित गरेको घोषणा गरेका हुन् ।

बैठकमा मुख्यमन्त्री राजेन्द्रकुमार राईले सांसदहरूले उठाएका प्रश्नहरूको जवाफ दिएका थिए । नीति तथा कार्यक्रममाथि एमालेका सांसदहरू हिक्मतकुमार कार्की, जीवन घिमिरे, बुद्धिकुमार राजभण्डारी, रामबहादुर मगर र लिलाबल्व अधिकारीले संशोधन गर्ने प्रस्तावहरु बहुमतले अस्वीकृत भएका छन् । 

असार १ गते प्रदेश सभा बैठकमा बजेट पेश हुँदैछ । दिउँसो २ बजे बस्ने बैठकमा प्रदेश १ का आर्थिक मामिला तथा योजना मन्त्री इन्द्रबहादुर आङवोले  आर्थिक वर्ष २०७९/८० को बजेट ल्याउने छन् । 

नीति तथा कार्यक्रममाथिको छलफलमा पूर्व मुख्यमन्त्रीद्वय शेरधन राई र भीम आचार्यसहित २० जना प्रदेश सभा सदस्यहरूले भाग लिएका थिए । 

छलफलमा उठेको जवाफ दिँदै मुख्यमन्त्री राईले राजनीतिक मतभेद र राजनीतिक विचार दृष्टिकोण फरक-फरक भए पनि प्रदेशको विकासमा एकताबद्ध भएर अघि बढ्न आग्रह गरे ।

उनले सांसदहरूलाई प्रस्तुत नीति तथा कार्यक्रम अनुरूप नै आगामी वर्षको बजेट आउने बताएका छन् । 

 सरकारबाट भएका कमीकमजोरी औँल्याउनु सकारात्मक भए पनि प्रदेश सरकारले केही गर्दै गरेन भन्नु पूर्वाग्रही हुने उनले बताए । उनका अनुसार बजेट तथा नीति कार्यक्रम साझा विषय भएकोले यसलाई मिलेर अगाडि बढाउनुपर्नेमा उनले जोड दिए ।

नीति तथा कार्यक्रममाथिको छलफलमा प्रमुख विपक्षी दल नेकपा एमालेका सांसदहरूले चुनावी सरकारले दीर्घकालीन महत्त्वका र पूरा हुन नसक्ने योजनाहरू ल्याएको भन्दै आलोचना गरेका छन् ।