नेकपा एमालेका उपमहासचिव प्रदीपकुमार ज्ञवालीले सरकारको परराष्ट्र सम्बन्धको प्रस्थान बिन्दु नै गलत भएको बताएका छन् । 

सोमवार संसदको अन्तर्राष्ट्रिय सम्बन्ध समितिमा परराष्ट्र नीतिबारे बोल्दै उपमहासचिव ज्ञवालीले यस्तो बताएका हुन् । 

उनले वर्तमान गठबन्धन सरकार बन्दै गर्दा नेपाली जनताको हित र राष्ट्रको हितमा काम गर्ने भन्दा पनि अन्य देशको लागि ‘कम्फर्टेबल’ बन्ने गरी अगाडि बढेको आरोप लगाए । 

ज्ञवालीले सरकारले पछिल्लो समय केही निर्णयहरू ‘कम्फर्टेबल’ बन्ने किसिमले गरेको पनि बताए । 

उनले सरकारले अन्तर्राष्ट्रिय सम्बन्धमा गरेका गतिविधिको कारण नेपालको परराष्ट्र सम्बन्ध विचलन आएको बताए । सरकारले शुरुमा नै चीनसँग कृत्रिम सीमा विवादको विषय निकालेर गल्ती गरेको उनको भनाइ छ । 

‘सरकार कुनै छिमेकीलाई रिझाउने र कुनै छिमेकीलाई चिढ्याउनेतिर गइरहेको छ, यो उचित भएन,’ उनले भने, ‘यसले हामीलाई समस्यामा पार्छ ।’

यस्तै उनले प्रधानमन्त्रीको अमेरिका भ्रमण रक्षा मन्त्रीको हैसियतमा हुन लागेको हो कि प्रधानमन्त्रीको हैसियतमा भनेर प्रश्न गरेका छन् ।

‘यो भन्दा अगाडि रक्षा मन्त्रीको अमेरिका भ्रमण गर्ने तालिका थियो । त्यो हो कि ? प्रधानमन्त्रीको हो ? यो पनि सदनले थाहा पाउनुपर्‍यो,’ उनले भने, ‘विभिन्न सम्झौताहरु गर्ने कुराहरु सुनिएको छ । त्यो गम्भीर कुराहरूमा सम्झौता गर्ने हो भने एउटै स्वर बनाएर जानुपर्छ । नेपाली कांग्रेसको सभापति र गठबन्धनको प्रधानमन्त्रीको हैसियतमा नभएर मुलुकको प्रधानमन्त्रीको हैसियतले जाने हो ।’