गुल्मी मुसिकोट नगरपालिका–३ की ५२ वर्षीया पुतली राना खुट्टा कुहिएर तीन महिनादेखि थला परेकी छन् । अहिले त उनको खुट्टामा कीरासमेत परिसकेको छ । 

यति हुँदा पनि उनको उपचारमा भने कसैले चासो दिएका छैनन् । उनको घर बागलुङको बडिगाड गाउँपालिका–२, दनियाँ हो । उनी श्रीमानको निधनपछि छोराछोरीले पनि हेर्न छोडेकाले विगत तीन वर्षदेखि माइती गाउँ मुसिकोटमा बस्दै आएकी छन् । 

माइतीले बनाइदिएको सानो झुपडी छ । गाउँमा अर्मपर्म गरेर भए पनि गाँस जुटाउँदै आएकी थिइन् । 

तीन महिनाअघि खाना पकाउने क्रममा खुट्टा जल्यो । उपचार गर्ने उपाय भएन । घाउ बल्झिँदै गएकाले अहिले कीरा परेर बेहाल भएको छ । 

उनी उठेर हिँडडुल गर्ने अवस्था छैनिन् । घरमा एक्लै भएकाले छिमेकीले उनलाई खाना दिने गरेका छन् । तर, अब भने दैनिक ज्यान गल्दै गएकाले जीवनदेखि हारेकी छन् । 

बिस्तारामै दिसापिसाब गर्छिन् । ‘दिसापिसाब र खुट्टा कुहिएर गन्हाउन थालेपछि कोही कोठामा पस्न खोज्दैनन् । अब खाना खाने आश पनि छैन,’ उनले रुँदै भनिन्, ‘बाँच्नभन्दा छिटै लैजा दैव ।’ 

पुतलीका एक छोरा र एक छोरी हुन् । छोरीले बिहे गरिन् । छोरा भारतमा परिवारसँग बस्दै आएका छन् । आमाको अवस्थाको बारेमा स्थानीयवासीले फोन गरेर जानकारी दिए पनि छोराछोरीले भने कुनै वास्ता गरेका छैनन् । 

मुसिकोट नगरपालिका–३ का वडाध्यक्ष शंकर रायमाझीलाई पनि पुतलीको बारेमा जानकारी नगराइएको होइन । तर, उपचारको कुनै व्यवस्था नभएको छिमेकी बताउँछन् । पुतलीको अवस्था बिग्रँदै गएपछि उपचारमा सहयोग गर्न छिमेकी पनि टाढिएका छन् । 

‘मैले अहिलेसम्म जेनतेन खाना पुर्‍याएकी छु । म पनि एक्ली काम गरेर खाने मान्छे कसरी गरुँ,’ स्थानीय जुना रानाले भनिन्, ‘श्रीमान मरे छोराले वास्ता गरेन, वडाध्यक्षले सुनेन अस्पताल लैजाने कोही भएन ।’ 

लामो समय अस्पतालमा बस्न पर्ने भएकाले सहयोग गर्ने मनकारी छैनन् । उनको दर्दनाक अवस्था देखेर जिब्रो टोक्ने र आँखा चिम्लिने धेरै छन् । स्थानीय सरकार वा सरकारका कुनै निकायले बेलैमा पुतलीको उपचार गर्ने विकल्प नखोजे ज्यानै तलमाथि हुने अवस्था छ । 

मुसिकोट नगरपालिकाका स्वास्थ्य संयोजक डिबी जिसीका अनुसार पालिकामा स्वास्थ्य उपचार तथा राहत कोष कार्यविधि छ । कार्यविधिका आधारमा परिवारको आर्थिक अवस्था हेरेर पाँचदेखि २५ हजार मेयर आफैँले दिन पाउँछन् । अझै ठूलो सहयोगका लागि कार्यपालिकाको निर्णय चाहिने जिसीले बताए । 

तर, पुतलीको उपचार गर्न लैजाने व्यक्तिको समस्या भइरहेको छ । पुतलीलाई शारीरिक तथा मानसिक समस्या दुवै भएकाले उपचारमा सँगै जाने व्यक्ति नहुँदा सहयोग गर्न नसकिएको जिसी बताउँछन् ।