एमालेका तीन नेताको घर नजिक बम राखिएपछि....

झापामा एमालेका तीन नेताको घर नजिकमा बम राखिएको घटनाप्रति सो पार्टीले गम्भीर ध्यानाकर्षण भएको जनाएको छ । झापास्थित पार्टीका स्थायी कमिटी सदस्य तथा पूर्व आन्तरिक मामिला तथा कानुनमन्त्री हिक्मत कार्की, लेखा आयोग सदस्य लिला कट्टेल कार्की र जिल्ला कमिटी अध्यक्ष दिपक कार्कीको घर नजिक प्रेसर कुकर बम राखेको घटनाप्रति एमाले झापाले घोर निन्दा र भत्र्सना गरेको हो । 

‘नेपाली जनताको वलिदानीपूर्ण संघर्षबाट प्राप्त भएको अधिकार प्रयोग गर्दै संविधानसभाबाट संविधान निर्माण भई सोही बमोजिमका संवैधानिक अधिकारहरू प्रयोग गर्न र स्वतन्त्र रुपले आफ्ना अभिव्यक्तिहरु राख्न संवैधानिक व्यवस्था हुँदाहुँदै देशको संविधान, कानुन र जनअधिकारको बर्खिलाप हुने गरी समाजमा फैलाउने अराजक गतिविधीहरु मौलाई रहेका छन्’ एमाले झापाका सचिव शिव ढुंगेलले जारी गरेको विज्ञप्तिमा भनिएको छ, ‘समाजको शान्ति, सुरक्षा, अमन चयन खलबल्याउने गरी र मानवीय क्षति तथा धनजनको क्षति हुने गरिका यस्ता क्रियाकलाप जोसुकैले गरेको भए पनि क्षमायोग्य छैन ।’
 
नेपाल सरकार, प्रहरी प्रशासन र सम्बद्ध निकाय यो घटनाबाट शान्ति सुरक्षा कायम गर्न असफल भएको देखिएको एमालेको आरोप छ । घटनाको सत्यतथ्य पत्ता लगाई दोषी माथि कडा भन्दा कडा कारवाही गर्न पनि एमालेले जोडदार माग गरेको छ । नेताहरुको घर नजिक शुक्रबार बम फेला परेको थियो ।