माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टी छाडेर गएका मोहन वैद्य र नेत्रविक्रम चन्द ‘विप्लव’ले गरेको क्रान्तिको प्रयासलाई आफूले सम्मान गर्ने बताएका छन् । वैद्य र विप्लवले गरेको संघर्ष नेपालको कम्युनिस्ट आन्दोलनको लागि राम्रो पाठ भएको उनले बताए । 

विप्लवको पार्टी छाडेका केन्द्रीय सदस्यहरूलाई पार्टी प्रवेश गराउँदै प्रचण्डले वैद्य र विप्लवलाई एकतामा आउन आग्रह गरेका हुन् । ‘यदि एकपटक फेरि सबै माओवादीले आत्मसमीक्षा गरेर देशको स्वाधीनताका लागि र देशको आर्थिक विकासका लागि हामी एक ठाउँमा जम्मा आऔं,’ प्रचण्डले भने, ‘हामी माओवादी मिल्न सके देशको अत्यधिक ठूलो शक्ति हामी विजयी हुनेछौँ ।’ 

माओवादी सबै एकठाउँमा होऔं भन्ने भावना सबै पार्टीमा रहेको भन्दै त्यो भावनलाई बुझ्न नसके कार्यकर्ताको भावना कसैले थाम्न नसक्ने उनले दाबी गरे । ‘विना आग्रह, पूर्वाग्रह आत्मसमीक्षा गरेर एक ठाउँमा उभिए हाम्रो शक्तिलाई कसैले रोक्न सक्दैन,’ प्रचण्डले भने ।