काठमाडौं उपत्यका ट्राफिक प्रहरी कार्यालयले सवारी साधनमा लेखिएको सायरी, कविता तथा गजलहरु मेट्ने अभियान थालेकाे छ। सवारी साधनमा ​अपाच्य खालका साहित्यिक सायरी, कविता, गजल तथा भनाईहरू लेख्दा त्यसले दुर्घटनाकाे जाेखिम बढाउने भन्दै प्रहरीले त्यसलाई हटाउने अभियान थालेकाे हाे ।

सवारी साधनका विभिन्न भागमा लेखिएका ती सायरीले चालकको ध्यान मोडिई दुर्घटना निम्त्याएको पाइएकाे ट्राफिक प्रहरीकाे भनाई छ । 

कानूनमा महिला, बालबालिका, सिमान्तकृत समूदायलाई अपमान र अवहेलना गर्ने गरी कुनै पनि लेख रचना कविता सायरी वा कुनै पनि प्रकारका सामग्री प्रचार–प्रसार गर्न वा लेख्न नपाइने उल्लेख भए पनि सवारीसाधनमा त्यस प्रकारका सामग्री लेखिएकाे पाइन्छ । 

अश्लिल लाग्ने र द्विअर्थी लेखहरूले सामाजिक र मानसिक खलल, हिंसा र विकृति बढाएको तथा सडक सभ्यतामा पनि आँच पुर्याएको प्रहरीकाे दाबी छ ।

त्यसैगरी सवारीको सिसामा स्टिकर वा अन्य कुनै प्रचार सामग्री नटाँस्न पनि ट्राफिक प्रहरीले चालकहरूलाई सुसूचित गरेको छ।  ट्राफिक प्रहरीले चालक आसपास क्याबिनको भागमा सजावटका लागि झल्लरलगायतका सामग्री तथा म्युजिक सिस्टम क्याबिनमा राख्न पनि निषेध गरेको छ।