जनता समाजवादी पार्टी (जसपा) नेपालको दुई फरक समूहले छुट्टाछुट्टै केन्द्रीय समिति बैठक डाकेका छन् । 

जसपाभित्र केन्द्रीय कार्यकारिणी समिति अध्यक्ष उपेन्द्र यादव र संघीय परिषद् अध्यक्ष डा. बाबुराम भट्टराई दुई समूहमा विभाजित भएका छन् । उनीहरूले छुट्टाछुट्टै बैठक बोलाएका हुन् । 

यादवले पर्साको वीरगंजमा असार २९ र ३० गतेका लागि केन्द्रीय समिति बैठक डाकेका छन् भने भट्टराईले असार २८ र २९ गते काठमाडौंमा केन्द्रीय समितिको विस्तारित बैठक डाकेका छन् । 

असार १६ को बैठकले असार २७ र २८ मा केन्द्रीय समिति बैठक डाकिएको जसपाका केन्द्रीय कार्यालय प्रमुख प्रकाश अधिकारीले विज्ञप्तिमार्फत जनाएका थिए । त्यसपछि असार २१ गते अधिकारीले अर्को विज्ञप्ति जारी गरी बकर ईदका कारण बैठक १ दिन सारिएको तथा असार २९-३० गते वीरगंजको टाउनहलमै बैठक हुने जानकारी दिएका थिए । 

त्यसपछि असार २४ गते अधिकारीले अर्को प्रेस विज्ञप्ति जारी गरी भट्टराई पक्षले बोलाएको बैठक अनधिकृत रहेको उल्लेख गरेका थिए । 'केही अराजक एवं गैरजिम्मेवार व्यक्तिहरूले पार्टीको विधान र निर्णयविपरीत अवैधानिक तथा अनधिकृत रूपमा सोही दिन जसपा नेपालको केन्द्रीय समितिको विस्तारित बैठक काठमाडौंमा बस्ने भनी सामाजिक संजाल लगायत केही सञ्चारमाध्यमबाट भ्रम फैलाइरहेको बुझिन आएको हुँदा काठमाडौंमा सोही दिन पार्टीको यस प्रकारको कुनै पनि आधिकारिक बैठक नरहेको प्रेस वक्तव्यमार्फत सबैमा जानकारी गराइन्छ,' अधिकारीले जारी गरेको विज्ञप्तिमा उल्लेख छ ।

असार १३ गते जसपाको केन्द्रीय कार्यकारिणी समितिको निर्णयअनुसार असार २९-३० गते वीरगंजमा बस्ने केन्द्रीय समितिको बैठक नै आधिकारिक रहेको उक्त विज्ञप्तिमा जनाइएको थियो । 

यता भट्टराई पक्षले पनि छुट्टै विज्ञप्ति जारी गरी असार २८ र २९ गते काठमाडौंमा केन्द्रीय समितिको विस्तारित बैठक बस्ने जनाएको छ । जसपा नेता विश्वदीप पाण्डेद्वारा जारी विज्ञप्तिमा उक्त बैठकमा छलफल हुने विभिन्न एजेन्डाहरू तय गरी बैठकको सूचना सबै पदाधिकारी, केन्द्रीय सदस्य तथा संघीय परिषद सदस्यलाई पठाइसकिएको उल्लेख छ ।

पार्टीको आन्तरिक अवस्था, स्थानीय निर्वाचनको समीक्षाबारे छलफल, संगठनबारे छलफल, आगामी कार्ययोजनाबारे छलफल गर्ने एजेण्डा निर्धारण गरिएको विज्ञप्तिमा उल्लेख छ । बैठकले समसामयिक विषयमा राजनीतिक प्रतिवेदन पनि पेश गर्ने उल्लेख गरिएको छ ।

उक्त दुई छुट्टाछुट्टै बैठकको प्रेस विज्ञप्तिले पनि जसपा औपचारिक रूपमा दुई समूहमा विभाजन भइसकेको पुष्टि हुन्छ ।