नेपाली सेनाले निर्माण गरेको गोरखाको बेनिघाट–आरुघाट–लार्केभञ्ज्याङ सडक सरकारलाई हस्तान्तरण गरेको छ । उक्त सडक खण्डअन्तर्गत धार्चे ७ हावाडाँडादेखि सोही गाउँपालिका ३ दोभासम्मको १८ किलोमिटर लामो सडक सेनाले सडक विभागलाई हस्तान्तरण गरेको हो । 

उक्त सडक खण्डको ट्रयाक निर्माण कार्य सम्पन्न भएकाले हस्तान्तरण गरिएको सेनाले जनाएको छ । सोमवार आयोजित एक कार्यक्रममा नेपाली सेनाको सडक निर्माण कार्यदल प्रमुख प्राविधिक सेनानी विनोद भट्टले सडक विभागअन्तर्गत ११ किलो छेपेटार–भालुस्वाँरा–वारपाक सडक योजना, गोरखाका प्रमुख पशुपति ज्ञवालीलाई हस्तान्तरण गरेका थिए । 

सेनाले उक्त सडकको ट्रयाक निर्माण कार्य २०७४ वैशाख ११ गतेबाट शुरू गरेको थियो । २०७३ मंसिर २६ गते बसेको मन्त्रिपरिषद् बैठकले उक्त सडक निर्माण कार्यको जिम्मा नेपाली सेनालाई दिएको थियो । 

उक्त सडक निर्माण भएपछि गोरखाको विकट उत्तरी हिमाली क्षेत्रमा पर्ने धार्चे गाउँपालिका तथा चुनमुब्री गाउँपालिका राष्ट्रिय सडक सञ्जालमा जोडिएको छ । उक्त सडकले समग्र उत्तरी गोरखाको विकासमा महत्वपूर्ण योगदान पुर्‍याउने विश्वास लिइएको नेपाली सेनाले जनाएको छ ।