जनता समाजवादी पार्टी (जसपा) नेपालका संघीय परिषद् अध्यक्ष डा. बाबुराम भट्टराईले नेकपा माओवादी केन्द्र पार्टी नेकपा एमालेजस्तै ‘जनताको बहुदलीय जनवादी’ बनेको निष्कर्ष निकालेका छन् ।

मंगलवार शुरू भएको आफूपक्षीय केन्द्रीय परिषद् सदस्यको भेलामा पेश गरिएको ‘पार्टी रूपान्तरण/पुनर्गठनको औचित्य र कार्यभार’ शीर्षकको राजनीतिक प्रतिवेदनमा भट्टराईले माओवादीसँग मौलिक विचारधारा बाँकी नरहेको दाबी गरेका छन् ।

‘माओवादी केन्द्रले हिजो माओवाद, एक्काइशौं शताब्दीको जनवाद, प्रचण्डपथ जस्ता विचारको कुरा गर्थ्यो । एमालेसँगको एकता, नेकपाको निर्माण र सहकार्यको करीब साढे ३ वर्षको अवधिमा यो पार्टी एमालेजस्तै ‘जनताको बहुदलीय जनवादी’ बन्यो । पुनश्च विभाजनपछि यसले आफूलाई फेरि ‘माओवादी’ भन्न थालेको छ । यो ब्राण्ड मात्रै हो कि विचारधाराले नै माओवादी हो भन्ने प्रश्न गर्न सकिन्छ । औपचारिक रूपमा ‘जनताको बहुदलीय जनवाद’ स्वीकार नगरे पनि त्यसभन्दा फरक कुनै मौलिक विचारधारा माओवादी केन्द्रसँग बाँकी देखिँदैन ।’