सत्तारूढ ५ दलीय सत्ता गठबन्धनले नेपाली कांग्रेसकी सांसद पुष्पा भुसाललाई उपसभामुखको उम्मेदवार बनाउने भएको छ ।

प्रधानमन्त्री शेरबहादुर देउवाको रोजाइमा भुसाललाई उपसभामुखको उम्मेदवार बनाउन लागिएको कांग्रेसका नेताहरूले बताएका छन् । 

भुसालले आफूलाई मन्त्री बनाउनुपर्ने नभए प्रमुख सचेतक बनाउनुपर्ने माग गर्दै आएकी थिइन् तर प्रधानमन्त्री देउवाले उपसभामुख संवैधानिक परिषद्को सदस्य समेत रहने भएकाले भुसाललाई नै उपसभामुख बनाउनुपर्ने तर्क गरेको कांग्रेसका नेताहरूले बताए । 

प्रतिनिधि सभाको उपसभामुख चयनका लागि असार ३१ गते निर्वाचन हुन लागेको छ । 

संसदमा सत्ता गठबन्धनमा रहेका दलहरूको स्पष्ट बहुमत रहेका कारण कांग्रेसका उम्मेदवारले सभामुखको निर्वाचन जित्ने अवस्था छ । प्रतिनिधि सभामा अहिले एमालेका ९८, कांग्रेसका ६३, माओवादी केन्द्रका ४९, एकीकृत समाजवादीका २३, जनता समाजवादीका २१, लोसपाका १३ र अन्य साना दल र स्वतन्त्र समेत गरी ४ जना सांसद छन् ।

उपसभामुखको उम्मेदवार छनोटबारे सत्तारूढ दलहरूले छलफल गरेर उपसभामुख कांग्रेसलाई दिने सहमति गरेका छन् । 

कांग्रेसले उपसभामुख पाउने भएपछि कांग्रेस नेत्री डिला संग्रौलाले पनि उपसभामुख पद दाबी गरेकी छन् । 

संवैधानिक व्यवस्थाअनुसार सभामुख र उपसभामुख पद फरक पार्टीको हुनुपर्ने व्यवस्था छ । त्यसैगरी सभामुखमा पुरुष भएकाले उपसभामुखमा महिला मात्रै उम्मेदवार हुन पाउँछन् ।

सभामुख माओवादी केन्द्रबाट प्रतिनिधित्व भएका कारण कांग्रेसले उपसभामुख पद पाउने भएको छ । उपसभामुखमा जनता समाजवादी पार्टीले पनि दाबी गरेको थियो ।