केन्द्रीय समितिको विवरण अद्यावधिक गर्न जनता समाजवादी पार्टी (जसपा) उपेन्द्र यादव समूह आइतवार निर्वाचन आयोग जाँदै छ । 

असार २९ र ३० गते पर्साको वीरगन्जमा भएको केन्द्रीय समिति बैठकको निर्णयअनुसार केन्द्रीय समितिको नामावली अद्यावधिक गर्न जसपा आयोग जाने भएको हो । उक्त बैठकले संघीय परिषद् अध्यक्ष डा.बाबुराम भट्टराईसहित ९ जना केन्द्रीय सदस्यलाई कारबाही गरी जिम्मेवारीबाट मुक्त गर्ने निर्णय गरेको थियो । 

बैठकले संघीय परिषद् अध्यक्षको जिम्मेवारी अशोक राईलाई दिएको छ । आइतवार आयोग गएर केन्द्रीय समितिको विवरण अद्यावधि गरिने केन्द्रीय सदस्य लाक्पा शेर्पाले जानकारी दिए । 

त्यस्तै, जसपाको केन्द्रीय समितिमा ३३ प्रतिशत महिला सहभागिता सुनिश्चितता गर्नुपर्ने उक्त विवरण पनि अद्यावधिक गरिने उनले बताए । ‘महिलाको संख्याका विषयमा आयोगले पत्र नै पठाएर ध्यानाकर्षण गराएको थियो, त्यस विषयमा पनि आयोगसँग छलफल हुन्छ,’ उनले भने ।

उपेन्द्र यादव पक्षले आयोगमा डा. भट्टराई लगायतलाई कारबाही गरिएको विवरण अद्यावधिक गरेपछि जसपा विभाजनको प्रक्रिया औपचारिक रूपमा शुरू हुनेछ । राजनीतिक रुपमा विभाजित भइसकेको जसपा निर्वाचन आयोगमा पुगेपछि कानूनी रूपमा पनि औपचारिक रूपमै विभाजन हुनेछ । 

यादव पक्षको बैठक एकदिन अगावै भट्टराई पक्षले पनि काठमाडौंमा छुट्टै बैठक आयोजना गरेको थियो । उक्त बैठकले जसपा पुनर्गठन गर्ने निर्णय गरेको थियो । सोहीअनुसार भट्टराई पक्षले पार्टी पुनर्गठनका लागि देशव्यापी अभियान चलाउने तयारी गरिरहेको छ ।