नेकपा माओवादी केन्द्रको साउन १५ गते बस्ने स्थायी कमिटी बैठकले पदाधिकारी टुंगो लगाउने भएको छ । शुक्रवार बसेको स्थायी कमिटी बैठकले साउन १५ गते दिउँसो ३ बजे स्थायी कमिटी बैठक बोलाउने र सोही बैठकले पोलिटब्युरो र पदाधिकारीको बारेमा टुंगो लगाउने निर्णय गरेको हो । बिहीवारदेखि शुरू भएको बैठक शुक्रवार समापन गरिएको छ । 

यही स्थायी कमिटी बैठकले पोलिटब्युरो र पदाधिकारीको विषयमा टुंगो लगाउने भनिए पनि उक्त विषय अर्को बैठकसम्मलाई थाती राखिएको प्रवक्ता कृष्णबहादुर महराले जानकारी दिएका छन् । यसअघि बसेको केन्द्रीय समिति बैठकमा अध्यक्ष पुष्पकमल दाहाल ‘प्रचण्ड’ले पोलिटब्युरोको प्रस्ताव गरे पनि उक्त विषयमा धेरैजनाले असन्तुष्टि जनाएका थिए । त्यसपछि उनले उक्त प्रस्तावलाई संशोधन गरेर अर्को बैठकमा पेश गर्ने प्रतिबद्धता जनाएका थिए । 

त्यस्तै बैठकले प्रदेशका पूर्व निर्धारित बैठकहरुको समय परिवर्तन गरेको छ । पार्टी अध्यक्ष प्रचण्ड साउन २१ देखि २५ गतेसम्म जापान भ्रमणमा जाने भएका कारण बैठक सारिएको पार्टीका प्रवक्ता महराले बताए । उनले आगामी साउन २१ गतेदेखि २५ गतेसम्म नेपाली जनप्रगतिशील मञ्चको निम्तोमा अध्यक्ष दाहाल जापान जान लागेको जानकारी दिए । 

प्रवक्ता महराले बैठकले प्रदेश १ को साउन २६ गते, मधेस प्रदेशको बैठक भदौ २ गते, लुम्बिनी प्रदेशको साउन २९ गते र सुदूरपश्चिमको बैठक भदौ ४ गते बस्ने जानकारी दिएका छन् । उनले प्रवासको बैठक भदौ ६ गते, विशेष प्रदेशको बैठक भदौ ४ गते र सम्पर्क मञ्चको बैठक भदौ ८ गते बस्ने बताए । 

उनले भने, ‘हामी फेरि साउन १५ गते ३ बजे बस्छौँ । अध्यक्ष कमरेड नेपाली जनप्रगतिशील मञ्चका निम्तोमा जापान जाँदै हुनुहुन्छ २१ गते । २१ देखि २५ गतेसम्म उहाँको जापान भ्रमण हुने भएकोले हामीले पहिला निर्धारित प्रदेशका बैठकहरुको बारेमा जुन तालिका थियो त्यो परिवर्तन गरको छौँ ।’