नेपाल भ्रमणमा रहेका अमेरिकी सहायक विदेशमन्त्री डोनाल्ड लुले परराष्ट्रमन्त्री नारायण खड्कासँग भेटवार्ता गरेका छन् । परराष्ट्र मन्त्रालय सिंहदरबारमा शुक्रवार दिउँसो भएको भेटवार्तामा विकास सहयोग, आर्थिक सहयोगलगायत विषयमा छलफल भएको मन्त्रालयले जनाएको छ ।

अमेरिकी आर्थिक सहयोग कार्यक्रम मिलेनियम च्यालेन्ज कर्पोरेसन (एमसीसी) अनुमोदनको बेला भएको १२ बुँदे व्याख्यात्मक घोषणा सम्बन्धमा कुराकानी भएको स्रोतको दाबी छ । 

लुसँगको भेटअघि संसदमा सम्बोधन गरेका मन्त्री खड्काले अमेरिकी राज्य साझेदारी कार्यक्रम (एसपीपी)बारे छलफल नहुने बताएका थिए । मन्त्री खड्काले साउन ९ गते एसपीपीमा सहभागी नहुने पत्र अमेरिकालाई पठाइएको संसदलाई जानकारी गराएका थिए ।  

‘दुवै पक्षले विकास सहयोग, आर्थिक सहयोग, खाद्य सुरक्षा र कोभिड–१९ विरुद्धको खोपलगायतका विभिन्न क्षेत्रमा छलफल गरेका छन’ मन्त्रालयले आफ्नो आधिकारिक ट्वीटमा लेखेको छ । 

मन्त्री लु बिहीवार काठमाडौं आएका हुन् । ८ महिनामा दोस्रो पटक नेपाल भ्रमणमा आएका लुले प्रधानमन्त्री शेरबहादुर देउवासँग पनि भेट्ने कार्यक्रम रहेको परराष्ट्र स्रोतले जानकारी दियो ।