नेपाली कांग्रेसका महामन्त्री विश्वप्रकाश शर्माले परराष्ट्र सम्बन्धमा गम्भीर बन्न सबैलाई आग्रह गरेका छन् । सरकारले स्टेट पार्टनरसीप प्रोगाम (एसपीपी)मा सहभागी नहुने पत्र अमेरिकालाई पठाएपछि उनले परराष्ट्र सम्बन्धमा देशलाई केन्द्रमा राखेर अघि बढ्न आग्रह गरेका हुन् । 

उनले शनिवार गरेको ट्वीटमा एसपीपीको च्याप्टर क्लोज भए पनि फेरि भविष्यमा यस्ता द्वन्द्वमा नेपाल फस्न सक्ने भएकाले आग्रहमुक्त र परिपक्व दृष्टि निर्माण हुनुपर्नेमा जोड दिएका छन् । उनले ट्वीटमा लेखेका छन् ‘एसपीपीमा सहभागी नहुने पत्र सरकारले अमेरिकालाई पठाएपछी यो च्याप्टर क्लोज त भयो तर भविष्यमा यस्तो द्वन्द्वमा नेपाल कहिल्यै नपर्न आग्रहमुक्त र परिपक्व दृष्टि निर्माण एवं परिपालनामा हामी सबै गम्भीर बनौँ ।’ 

उनले परराष्ट्र सम्बन्धमा व्यक्ति र दलभन्दा माथि उठ्न पनि आग्रह गरेका छन् । उनले लेखेका छन्, ‘परराष्ट्र सम्बन्धमा ब्यक्ति र दल होइन देशलाई केन्द्रमा राखेर बढौँ ।’ 

उनले गल्ती दोहोर्‍याउन नहुने पनि जोड दिएका छन् । उनले लेखेको छन्, ‘हामी पहिला गल्ती गर्छौँ, पछि आत्मालोचना, अनि फेरि गल्ती दोहोर्याउँछौँ ! नेपालको समुन्नतिका लागि यो परम्परागत बेथिति हरेक क्षेत्रमा अन्त्य गर्न अनिवार्य छ । भू–राजनैतिक संवेदनशीलता दृष्टिगत गरेर परराष्ट्र सम्बन्धमा त झनै अनिवार्य छ ।’