अर्घाखाँचीको मालारानी गाउँपालिका–२ घर का विष्णुबहादुर पाण्डेको आफ्नै नजिकका साथी हत्या गरेको खुलेको छ ।

बुटवल बेलबासमा बस्दै आएका पाण्डेलाई रुपन्देहीको सैनामैना ६ का दीपक भनिने कूलचन्द्र गौतमले हत्या गरेको प्रहरीले बताएको छ । 

४४ वर्षीय पाण्डेलाई ४३ वर्षीय गौतमले १६ लाख रुपैयाँका लागि हत्या गरेको इलाका प्रहरी कार्यालय, बुटवलका प्रमुख डिएसपी ठगबहादुर केसीले जानकारी दिए ।

गौतमलाई साउन १५ गते (आइतबार) बिहान रूपन्देहीको नेपाल भारत सीमा नाका बेलहियाबाट पक्राउ गरेको छ ।  

पाण्डेसँग १६ लाख रुपैयाँमा किनेको ट्रकको रकम तिर्न नसकेपछि गौतमले कालिज मार्न जाने बहाना बनाएर फकाईफुलाई जंगलमा लगेर हत्या गरेको खुलेको डिएसपी केसीले बताए । 

पाण्डेसँगबाट लु१ख ७७८१ नम्बरको ट्रक गौतमले पछि रकम तिर्ने शर्तमा किनेका थिए । 

उक्त रकम दिने भन्दै गौतमले पाण्डेलाई ९ साउनमा बुटवलबाट अर्घाखाँचीको पाणिनी पुर्‍याएका थिए । तर, घरमा पुगेपछि परिवारले रकम नभएको बताएपछि कुलचन्द्रले योजनावद्ध रुपमा हत्याको योजना बनाएका थिए ।

१० साउनमा गौतमले पाण्डेलाई कालिज मार्न जाऔं भनी पाणिनी गाउँपालिका–२ डांडाकटेरीस्थित सिद्ध सामुदायिक वनको जंगलमा पुर्‍याएका थिए । 

त्यहाँ पाण्डेलाई फलामको रडले पछाडिबाट टाउकोमा प्रहार गरी भीरबाट खसालेर हत्या गरेको अनुसन्धानबाट खुलेको केसीले बताए ।

पाण्डे सम्पर्कविहीन भएपछि छोरी शीला पाण्डेले साउन ११ गते इलाका प्रहरी कार्यालय बुटवलमा खोजी गरिदिन निवेदन दिएकी थिइन् ।

जिल्ला प्रहरी कार्यालय अर्घाखाँचीबाट खटिएको टोलीले खोजतलास गर्दा साउन १४ गते दिउँसो ३ बजे पाणिनी–२ डांडाकटेरीस्थित सामुदायिक वनमा पाण्डे मृत अवस्थामा फेला परेका थिए । 

अनुसन्धानको क्रममा हत्यामा प्रयोग भएको फलामको मोटो रड गौतमको बुटवल मैनाबगरस्थित जय मोटरपार्टस्मा लुकाइ राखेको अवस्थामा फेला पारी बरामद गरेको छ ।