नेकपा एमालेका उपाध्यक्ष तथा पूर्वअर्थमन्त्री विष्णु पौडेलले पदका लागि जे पनि गर्न तयार हुने प्रवृत्तिले कम्युनिष्ट पार्टीभित्र विचलन देखिएको बताएका छन् ।  जीवराज आश्रितको ७९ औ जन्मजयन्तीका अवसरमा बुटवलमा आयोजित विचार गोष्ठीमा बोल्दै पौडेलले पद प्राप्ति नै सबैथोक हो भन्ने प्रवृत्ति कम्युनिष्ट पार्टीमा लागेकाहरूले त्याग्नुपर्ने बताए । 

माओवादी केन्द्रका अध्यक्ष पुष्पकमल दाहाल र एकीकृत समाजवादीका अध्यक्ष माधव नेपालप्रति लक्षित गर्दै उनले पदका लागि नै शक्तिशाली कम्युनिष्ट पार्टी विभाजन गरिएको दावी गरे । कम्युनिष्ट पार्टी विभाजित हुनुमा दलीय लालचाबाहेक अरु केही नभएको र, शक्तिशाली अवस्थामा पुगेको कम्युनिष्ट पार्टीलाई पदका लागि विभाजन गर्नु दुर्भाग्यपूर्ण भएको उनले बताए । 

नेता पौडेलले स्वर्गीय आश्रितबाट अहिलेका समकालीन नेताहरुले त्याग र र विचारको राजनीतिक संस्कार सिक्नु जरुरी रहेको पनि बताए । आश्रित बहुआयामिक योगदान रहेको बताउँदै उनले कम्युनिष्ट आन्दोलनमा लागेकाहरुले उनीबाट त्याग र विचारको राजनीति सिक्नुपर्नेमा जोड दिए । त्यसो भएमात्रै कम्युनिष्ट पार्टीले लिएको लक्ष्य र उद्देश्य पूरा हुने उनको भनाइ थियो ।