नेकपा एकीकृत समाजवादीका सम्मानित नेता झलनाथ खनालले चीन भ्रमणका क्रममा परराष्ट्रमन्त्री डा. नारायण खड्काले बीआरआई र सीमा समस्याको विषय उठान गर्नुपर्ने सुझाव दिएका छन् । मंगलवार प्रधानमन्त्री शेरबहादुर देउवासँग भेटेपछि सञ्चारकर्मीहरूलाई प्रतिक्रिया दिँदै उनले यो भ्रमण महत्वपूर्ण रहेको बताए । 

उनले परराष्ट्रमन्त्रीको चीन भ्रमणका क्रममा नेपालले चीनसँग गरेको बीआरआई सम्झौता, सीमा समस्या र सम्भव हुने सहमतिका बारेमा जोड दिनुपर्ने बताए । उनले नेपाल ‘एक चीन नीति’ प्रतिबद्ध रहेको विश्वास दिलाउन सक्नुपर्ने बताए । हङकङ, ताइवान र तिब्बत चीनकै भएको दाबी गर्दै उनले यी क्षेत्रमा चीनले जुनकुनै बेला दाबी गर्नसक्ने बताए । 

उनले यो भ्रमणबाट नेपालले धेरै लाभ लिनसक्ने बताए । ‘परराष्ट्रमन्त्रीको चीन भ्रमण महत्वपूर्ण भ्रमण हो । हामीले छिमेकबाट लिनसक्ने लाभका बारेमा हामीले सोच्नुपर्छ । परराष्ट्रमन्त्रीको यो भ्रमणले केही राम्रा उपलब्धीहरू हासिल हुनेछ’, उनले भने, ‘बीआरआईको बारेमा सम्झौता भएको छ, केही पनि कार्यान्वयन भएको छैन । सीमाको बारेमा पनि समस्या आउन खोज्छ, त्यसको समाधानको दीर्घकालीन आधार तयार पार्नुपर्छ । सम्भव हुने सहमतिका बारेमा पनि कुरा होस् भन्ने कुरा नेपाली जनताको चाहना हो ।’