भत्ता पचाएर सांसदहरूले हिँडेपछि प्रतिनिधि सभा बैठकमा गणपूरक संख्या अपुग भएको छ । विधेयक पारित गर्न आवश्यक एक चौथाइ सदस्य संसद्मा उपस्थित नहुँदा प्रतिनिधि सभा बैठक स्थगित भएको हो ।

अर्थमन्त्री जनार्दन शर्माले पेश गरेको सार्वजनिक ऋण व्यवस्थापन विधेयकलाई निर्णयार्थ पेश गर्ने क्रममा गणपूरक संख्या अभाव देखिएको थियो । सभामुखको आसनमा बसेकी उपसभामुख पुष्पा भुसालले विधेयकलाई निर्णयार्थ पेश गर्ने क्रममा नेमकिपा सांसद प्रेम सुवालले गणपूरक संख्या यकिन गर्न माग गरेका थिए । 

त्यसपछि तीन मिनेट जनाउ घण्टी बजाएर गणना गर्दा ६७ सांसद मात्र उपस्थित थिए । कुनै प्रस्तावलाई निर्णयार्थ पेश गर्न प्रतिनिधि सभामा रहेका २७५ सांसदको एक चौथाई अर्थात ६९ जना उपस्थित हुनुपर्नेमा ६७ सांसद उपस्थित थिए । 

त्यसपछि सभामुख अग्नि सापकोटाले १५ मिनेटको लागि बैठक स्थगित गरेका छन् । यसअघि बसेको बैठक पनि गणपूरक संख्या नपुगी स्थगित भएको थियो । सो प्रस्तावलाई आज निर्णयार्थ पेश गरिएको थियो । 

बैठकमा हाजिर गरेपछि सांसदले २ हजार बैठक भत्ता र ट्याक्सी खर्चबापत हजार रुपैयाँ पाउँछन् । सांसदहरू गैर जिम्मेवार बन्दा संसदमा बैठक पटक–पटक स्थगित हुँदै आएको छ ।

१५ मिनेटपछि बसेको दोस्रो बैठकमा पनि कोरम नपुगेपछि प्रतिनिधि सभा बैठक मंगलवारसम्मको लागि स्थगित भएको छ ।