नेपाली कांग्रेसका पूर्व उपसभापति विमलेन्द्र निधि प्रत्यक्ष चुनाव नलड्ने भएका छन् ।

निधिनिकट स्रोतबाट प्राप्त जानकारी अनुसार उनले समानुपातिकबाट सांसद बन्ने मनसाय बनाएका छन् ।

यसअघि उनी धनुषा–३ बाट चुनाव लड्दै आएका थिए । गत चुनावमा लोकतान्त्रिक समाजवादी पार्टी (लोसपा) वरिष्ठ नेता राजेन्द्र महतोसँग उनी चुनाव हारेका थिए ।

आसन्न चुनावमा लोसपालाई गठबन्धनमा ल्याउनका लागि महतोलाई सिट छाडेर निधि समानुपातिकमा जान तयार भएका हुन् । कांग्रेसको पछिल्लो महाधिवेशनअघि सभापति शेरबहादुर देउवा पक्षमा रहँदा उनी प्रभावशाली थिए । देउवा समूह छाडेर सभापति पदमा चुनाव लडेपछि उनी कांग्रेसभित्र कमजोर भएका छन् ।

निधि कांग्रेस उपसभापति, महामन्त्री, उपप्रधानमन्त्री र गृहमन्त्री समेत भइसकेका नेता हुन् ।