नेकपा एकीकृत समाजवादीका सम्मानित नेता झलनाथ खनालले तत्कालीन नेतृत्वको दक्षिणपन्थी अवसरवादविरुद्ध गरिएको विद्रोह ऐतिहासिक कदमको रूपमा स्थापित भइरहेको दाबी गरेका छन् ।

पार्टी स्थापनाको एकवर्ष पुगेको अवसरमा बिहीवार काठमाडौंमा आयोजित कार्यक्रममा नेता खनालले केपी ओलीको दक्षिणपन्थी अवसरवादविरुद्ध गरिएको विद्रोह क्रान्तिकारी कदम रहेको बताएका हुन् । 

‘खड्गप्रसाद ओली नेतृत्वको सरकार दक्षिणपन्थी अवसरवादतिर भासिँदै गरेकाले ऐतिहासिक विद्रोह गरेर पुनर्गठन गरेका थियौँ’, खनालले भने, ‘दक्षिणपन्थी अवसरवादविरुद्ध विद्रोह ऐतिहासिक कदम, नयाँ क्रान्तिकारी पार्टी गठन गर्‍यौँ ।’ 

खनालले ओली गुटमा दक्षिणपन्थी अवसरवाद झन्–झन् झाँगिदै गएको आरोप लगाए । ‘पार्टी निर्माण प्रक्रिया क्रमश विस्तार हुँदैछ, विभिन्न पार्टी छाड्ने क्रम चलिरहेको छ’, खनालले भने ।