ऊर्जा, जलश्रोत तथा सिँचाइमन्त्री पम्फा भुसालले विद्युत् निर्यातले देशको व्यापार घाटा कम गर्न महत्वपूर्ण योगदान गर्ने बताएकी छन् । 

मंगलवार नेपाल विद्युत् प्राधिकरणले काठमाडौंको रत्नपार्कमा सञ्चालनमा ल्याएको चार्जिङ स्टेसनको उद्घाटन गर्दै मन्त्री भुसालले यस्तो बताएकी हुन् । उनले देशले विद्युतको क्षेत्रमा ठूलो क्रान्ति गरिरहेको बताइन् । मुलुकभित्रकै जलस्रोतबाट विद्युत् उत्पादन गरेर आफैँले प्रयोग गर्नु महत्वपूर्ण काम भएको उनको भनाइ थियो । 

मन्त्री भुसालले यातायात सञ्चालनको लागि ३ खर्बको डिजेल र पेट्रोल आयात हुने अवस्थालाई रोक्नुपर्नेमा जोड दिँदै विद्युत् खपत बढाउने माध्यम विद्युतीय यातायातको विकल्प नभएको पनि बताइन् । उनले पछिल्लो एक वर्षमा विद्युत् खपत २२ प्रतिशतले बढे पनि विद्युतीय यातायातको सोचजस्तो विकास नभएको बताइन् । 

रुस र युक्रेन युद्धको कारण विश्वले भोगेको मुख्य समस्या ऊर्जा संकट भएको बताउँदै मन्त्री भुसालले विश्वका धेरै देशहरूलाई डिजेल र पेट्रोलको प्रतिस्थापनको विकल्प नभए पनि नेपालले विद्युतबाट परिपूर्ति गर्नुसक्ने बताइन् । उनले विद्युत् खपत बढाउने तथा बढी भएको विद्युत् निर्यात गरेर मुलुकको व्यापार घाटा कम गर्न योगदान गर्ने बताइन् । 

मन्त्री भुसालले आत्मनिर्भर अर्थतन्त्रका लागि सञ्चारमाध्यमहरूले जलविद्युतको विकासमा जोड दिनुपर्ने बताए । उनले पछिल्लो समय मुलुकमा विद्युतीय सवारीसाधनको माग अत्याधिक रहेको बताए ।