प्रमुख प्रतिपक्षी दल नेकपा एमाले फरक मत समेटेर नागरिकता विधेयक राष्ट्रिय सभाबाट पारित गर्न माग गरेको छ । एमाले सांसद देवेन्द्र दाहालले नागरिकतासम्बन्धी विधेयकलाई सहमतिको आधारमा पारित गरिनुपर्ने बताएका हुन् । 

बिहीवार राष्ट्रिय सभाको दोस्रो बैठकमा राष्ट्रपतिबाट पुनर्विचारका लागि फिर्ता भई प्रतिनिधि सभाबाट सन्देशसहित प्राप्त नेपाल नागरिकता (पहिलो संशोधन) विधेयक, २०७९ सम्बन्धी विधायन व्यवस्थापन समितिको प्रतिवेदनमाथिको छलफलमा भाग लिँदै उनले विधेयकमाथि आफ्नो पार्टीको फरक मत रहेको बताए । उनले फरक मतलाई पनि सम्बोधन गरिनुपर्ने बताए । 

दाहालले विधेयकलाई सहमतिको दस्तावेजको रुपमा पारित गरिनुपर्ने बताउँदै भने,‘यो विधेयक हाम्रो अगाडि प्रस्तुत भएको छ । विधायन व्यवस्थापन समितिमा छलफल भएको छ । विधायन व्यवस्थापन समितिमा छलफल भएर हामीले फरक मत राखेका छौँ । यि फरक विचारलाई पनि सम्बोधन गरेर नागरिकताजस्तो विधेयकलाई पारित गरिनुपर्छ । यहाँ कुनै टाउको गनेर वा हुन्छ वा हुन्न भनेर यो नागरिकता विधेयक पारित गरिनुहुन्न । यसलाई सहमतिको आधारमा, सहमतिको दस्तावेजको रूपमा यो विधेयकलाई पारित गरिनुपर्छ । र नागरिकताविहीन नागरिकलाई नागरिकता दिनेगरी सबै सोच्नुपर्छ । त्यो कुरा प्रतिपक्षतर्फ सोज्याउने होइन सत्तापक्ष जिम्मेवार भएर यो विधेयकलाई पारित गरिनुपर्छ ।’

उनले विधेयकलाई विधायन व्यवस्थापन समितिमा बहुमतले पारित गरेको उल्लेख गर्दै समितिमा पनि आफूहरुले गम्भिर असहमति राखेको स्पष्ट पारे । दाहालले नागरिकता विधेयकमाथि सत्ता पक्षले भोटको राजनीति गरेको आरोप लगाए । उनले सत्तारुढ गठबन्धनले राष्ट्रियतामाथि खेलबाड गरेको बताए ।