कानून, न्याय तथा संसदीय मामिलामन्त्री गोविन्दप्रसाद शर्मा कोइराला (गोविन्द बन्दी)ले जिम्मेवार ठाउँमा बसेर स्वतन्त्र न्यायपालिकाले गरेको निर्णयलाई काम चलाउ सरकार नभन्न आग्रह गरेका छन् । मंगलवार प्रतिनिधि सभाको पहिलो बैठकमा बोल्दै उनले प्रतिपक्ष दलका सांसदहरूले अहिले पनि संविधानले न्यायपालिकालाई दिएको स्वतन्त्र अधिकारको निर्णयलाई काम चलाउन नभन्न भन्दै आक्रोश पोखेका हुन् । 

उनले संविधानले काम चलाउ सरकारको परिकल्पना नगरेको उल्लेख गर्दै एकछिनको न्यानो नहेरी भावी दिनलाई सोचेर बोल्नुपर्ने बताए । मन्त्री कोइरालाले विदेश नीति, फण्डामेण्टल कन्स्यूट्युस्नल प्रिन्सिपल र स्वतन्त्र न्यायपालिकाका बारेमा जथाभावी शब्द प्रयोग नगर्न विपक्षी दल नेकपा एमालेका सांसदहरूसँग आग्रह गरे ।

उनले ‘नेपालको संविधानले सर्वोच्च अदालतलाई दिएको अधिकारलाई प्रयोग गरेर गरेको निर्णयलाई व्यंग्यात्मक रूपमा संसदमा प्रश्न उठाइरहने हो भने कस्तो न्यायपालिकाको कल्पना गरेका हौँ ?’ भन्दै प्रश्न गरे । उनले संसदमा परराष्ट्र नीतिका बारेमा सांसदहरूले जथाभावी बोल्दा अन्य देशहरूसँगको सम्बन्ध बिग्रिँदै गइरहेको बताए । 

‘हामी हरेकपटक काम चलाउ सरकारको कुरा किन गरिरहेका छौँ ? के कुरा गरिरहेका छौँ हामी ? हाम्रो संविधानले कामचलाउ सरकारको परिकल्पना गरेको छ ? हामी अहिले पनि जिम्मेवार ठाउँमा बसेर भोलि सरकार चलाउनुपर्नेहरूले भनिरहेका छौँ । अहिले एकछिनको न्यानो नहेरौँ । भोलि हामीलाई यिनै रेकर्ड भएर बसेका कुराले विवादित गर्नेछ । अहिलेको प्रतिपक्षलाई भोलि सरकार चलाउनु पर्छ’, उनले भने, ‘तर फण्डामेण्टल कन्स्यूट्युस्नल प्रिन्सीपलमा हामी विवाद गर्नुहुन्न, विदेश नीतिमा हामी विवाद गर्नुहुन्न, स्वतन्त्र न्यायपालिकाका बारेमा जथाभावी शब्द प्रयोग गर्नुहुन्न ।’

मन्त्री कोइरालाले नयाँ निर्वाचित संसदको बैठक नबस्दासम्म प्रतिनिधि सभाको कार्यकाल चालु रहने प्रस्तावबाट सरकार पछि हटेको बताए । उनले यसबारेमा अन्योलता कायम रहेकोले अन्योलता चिर्न प्रस्ताव ल्याइएको भए पनि तत्कालका लागि भने सरकार पछि हट्ने जानकारी गराए । मन्त्री कोइरालाले यही विषयलाई राजनीति बनाएर जान आवश्यक नरहेको पनि औँल्याए । उनले एउटा संविधानविद्ले भनेको भरमा संसदको कार्यकाल शुरु र अन्त्य हुन नहुने बताए ।