सत्तारूढ गठबन्धनले सिट बाँडफाँटको लागि बनाएको कार्यदलको निर्णायक बैठक प्रधानमन्त्री निवास बालुवाटारमा जारी छ ।

मंसिर ४ गते हुने प्रदेश सभा र प्रतिनिधि सभाको चुनावमा सत्तामा रहेका दलहरूले तालमेल गर्ने निर्णय गरेका छन् ।

नेपाली कांग्रेस, माओवादी केन्द्र, एकीकृत समाजवादी, जनता समाजवादी पार्टी र राष्ट्रिय जनमोर्चाले चुनावी तालमेलका लागि सिट बाँडफाँटको गृहकार्य गरिरहेका छन् ।

प्रदेश सभाको ३३० र प्रतिनिधि सभाको १६५ सिटको बाँडफाँटबारे गठबन्धनभित्र निरन्तर छलफल चलिरहेको छ । 

कार्यदलको बुधवारको बैठकले सिट बाँडफाँटमा निर्णायक छलफल गर्ने र बिहीवार बिहान बस्ने गठबन्धनको शीर्ष नेताहरूको बैठकले सिट बाँडफाँटलाई टुंगो लगाउने बताइएको छ । 

बुधवारको बैठकमा सबै विषयमा सहमति हुन नसके पनि हालसम्म सहमति भएको निर्वाचन क्षेत्र र सिट संख्या समावेश गरेर प्रतिवेदन बनाउने तयारी भइरहेको बैठकमा सहभागी एक नेताले जानकारी दिए । 

‘आजको बैठकबाट सकेसम्म सहमतिको प्रयास गर्छौं । नमिलेको निर्वाचन क्षेत्र र सिट संख्याको बारेमा भोलि (बिहीवार) बस्ने शीर्ष नेताहरूको बैठकले टुंगो लगाउँछ,’ कार्यदलमा सदस्यको रूपमा काम गरिरहेका एक नेताले भने ।

उनका अनुसार अहिलेसम्म प्रतिनिधि सभाको कूल १६५ मध्ये १०० सिटको बाँडफाँटका कुरा मिलिसकेको छ । बाँकी ६५ सिटमध्ये धेरैजसोमा बुधवारको बैठकबाट टुंगो लगाउने र मिल्न नसकेका निर्वाचन क्षेत्रबारे भने शीर्ष नेताहरूले नै निर्णय गर्ने कार्यदलका ती सदस्यले जानकारी दिए । 

गठबन्धनभित्र कांग्रेसले ५० प्रतिशत र अन्य दलले बाँकी ५० प्रतिशतको आसपासमा सिट लिने गरी मोटामोटीरूपमा सिटको संख्या टुंगो लगाइएको छ । अहिलेसम्म कुरा मिलिसकेका १०० सिटमध्ये धेरैजसो कांग्रेसले दाबी गरेका निर्वाचन क्षेत्रहरू रहेका ती नेताले जानकारी दिए ।

गठबन्धनको कार्यदलमा कांग्रेसबाट ३, माओवादी केन्द्रबाट २, नेकपा एकीकृत समाजवादीबाट २, जनता समाजवादी पार्टीबाट २ र राष्ट्रिय जनमोर्चाबाट २ जना सदस्य छन् ।