उद्योग, वाणिज्य तथा आपूर्तिमन्त्री दिलेन्द्रप्रसाद बडूले स्थानीय तहहरूलाई बजार अनुगमन गर्न आग्रह गरेका छन् । शनिवार खाद्य व्यवस्था तथा व्यापार कम्पनी लिमिटेडले थापाथलीमा स्थापना गरेको चाडबाडलक्षित सुपथ मूल्य पसलको उद्घाटन गर्दै उनले स्थानीय तहहरूलाई प्रभावकारी रूपमा बजार अनुगमन गर्न आग्रह गरेका हुन् । 

उनले दशैं, तिहार, छठलगायतका चाडपर्वहरू आइरहेको र चाडपर्वको बेलामा बजारमा अस्वभाविक रूपमा मूल्यवृद्धि हुने भएकाले तीनै तहको सरकारले बजार अनुगमन गर्नुपर्ने बताए । मन्त्री बडूले मन्त्रालयले जनशक्ति बढाएर अनुगमन बढाइरहेको भए पनि मन्त्रालयको एकल प्रयास मात्र सम्भव नहुने स्पष्ट पारे । 

उनले बजार अनुगमनका लागि प्रदेश र स्थानीय तहको अधिकार बढेको भए पनि ति तहहरूबाट अपेक्षित र प्रभावकारी रुपमा अनुगमन हुन नसकेको बताए । मन्त्री बडूले खाद्य व्यवस्था तथा व्यापार कम्पनी लिमिटेडलाई आफ्नो सम्पतिको यथार्थ अभिलेखिकरण राख्न निर्देशन पनि दिए । 

‘नेशनल ट्रेडिङ र खाद्य संस्थान एक ठाउँमा आइसकेपछि यसको सम्पत्ति धेरै बढेको छ । भौतिक सम्पत्ति धेरै बढेको छ, तर त्यसको क्यास सम्पत्तिमा तपाईंहरू रुपान्तरण गरेर त्यसको व्यापारिक लाभ लिनसक्ने योजना तयार गर्नुस् । सही अभिलेखिकरण हुन सकिरहेको अवस्था होइन भन्ने सुनिरहेको छु । यसलाई छिटोभन्दा छिटो अभिलेखिकरण गर्नुस् । र यो सम्पत्तिको सदुपयोग जनताको सेवामा, सस्तो सेवा दिन सकौँ । सस्तो सेवा धेरै ठूलो परिमाणमा दिन सकियो भने नाफा पनि कमाउनुहुन्छ’, उनले भने, ‘यसको परिमाण बढाउनुस् । अनुगमन पनि हुनुपर्ने अवस्था छ । गुणस्तरीय वस्तु सर्कुलेशनमा आउनुपर्‍यो । बजारको अनुगमन बढाउनुपर्छ ।’

मन्त्री बडूले चाडपर्व लक्षित सुपथ मूल्य पसलमा बिक्री वितरण गर्ने खाद्यवस्तुको संख्या र सहुलियत बढाएको बताए । खाद्य व्यवस्था तथा व्यापार कम्पनी लिमिटेडले ४१ जिल्लाका ४५ वटा शाखाहरूमा एकै पटक सुपथ मूल्य पसल उद्घाटन भएर सञ्चालनमा आएको जनाएको छ ।