प्रतिनिधि सभाको महाभियोग सिफारिस समितिको बैठक पुन बसेको छ । शनिवार बिहान निलम्बित प्रधानन्यायाधीश चोलेन्द्रशमशेर जबरासँग पूरक बयान लिएको समितिको बैठक अपराह्न पुनः बसेको हो । 

सिंहदरबारमा जारी बैठकमा समितिका सदस्यहरूले महाभियोगबारे आ आफ्नो धारणा राखिरहेका छन् । नेकपा एमालेका सांसदहरूले हालसम्म प्राप्त प्रमाण र बयानकै आधारमा जबरामाथिको महाभियोग पुष्टि हुन नसक्ने तर्क गरिरहेका छन् । 

एमाले सांसद कृष्णभक्त पोखरेल, लालबाबु पण्डित, शिवमाया तुम्बाहाङफे लगायतले समितिले छोटो समय पाएका कारण पर्याप्त प्रमाण जुटाउने काम हुन नसकेको बताए । उनीहरूले अरु कसैले आरोप लगाएको, जबराले फैसला उल्ट्याएको, उनका आफन्तका नाममा सम्पत्ति देखिएकै आधारमा महाभियोग पुष्टि हुन नसक्ने बताए । 

एमाले सांसद तुम्बाहाङफेले फैसला उल्ट्याएकै आधारमा महाभियोग पुष्टि हुने हो भने अधिकांश न्यायाधीशहरू कारबाहीको दायरामा आउने बताइन् । उनले अदालतमा फूल बेन्चले गरेको कतिपय फैसलाहरू उल्टिएको दृष्टान्त प्रस्तुत गर्दै रन्जन कोइरालाको मुद्दाकै सन्दर्भलाई लिएर जबरामाथिको महाभियोग पुष्टि नहुने बताइन् । 

समितिले शनिवार नै प्रतिवेदन तयार गरेर सभामुखलाई बुझाउने तयारी गरेको छ ।