बागमती प्रदेश सभाका सदस्यहरूले प्रदेश सभाबाट प्राप्त गरेका सेवा सुविधा कार्यकाल सकिँदासमेत फिर्ता नगरेको पाइएको छ । २०७४ साल माघ ७ गते प्रदेश सभा सदस्यको सपथ लिएपछि पदीय सुविधास्वरूप प्रदेश सभा सचिवालयबाट प्राप्त गरेका गाडी हालसम्म फिर्ता नगरेका हुन् । 

निर्वाचन आयोगले आगामी मंसिर ४ गते  प्रतिनिधि सभा र प्रदेश सभाको निर्वाचन मिति घोषणा गरेसँगै प्रदेशसभा सचिवालयले शनिवार (असाेज १ गते) बिदाइसमेत गरेको थियो । प्रदेश सभाको कार्यकाल गत शनिवार मध्यरातिबाट सकिएको थियो । 

हालसम्म प्रदेशसभामा विषयगत समितिका निवर्तमान सभापति, दलका नेता र प्रमुख सचेतकहरू गरी ४ जनाले मात्र आफूले सुविधावापत प्राप्त गरेको सवारी–साधन फिर्ता गरेका छन् । नेकपा एमालेका प्रमुख सचेतक रहेका दीपक निरौला, नेकपा समाजवादीका प्रमुख सचेतक मुनु सिग्देल, शिक्षा स्वास्थ्य तथा कृषि समितिका सभापति केशवप्रसाद पोखरेल र अर्थ तथा विकास समितिका सभापति नारायणबहादुर सिलवालले मात्र मंगलवारसम्म गाडी फिर्ता गरेको प्रदेश सभा सचिवालयले जानकारी दिएको छ । 

प्रदेश सभा सचिवालयका अनुसार प्रदेश मामिला समितिका सभापति माधवप्रसाद पौडेल, सार्वजनिक लेखा समितिका सभापति न्हुक्षेनारायण श्रेष्ठ, उद्योग, पर्यटन तथा वातावरण समितिका सभापति रमा आले मगर र विपक्षी दलको नेता अष्टलक्ष्मी शाक्यले गाडी फिर्ता गनए बाँकी रहेको छ । 

प्रदेश सचिवालयका एक कर्मचारीले भने, ‘भर्खरै समयावधि सकिएको छ । कतिपय प्रदेशसभा सदस्यहरू अस्तिको सचिवालयको कार्यक्रममा पनि अनुपस्थित हुनुहुन्थ्यो आउने क्रम जारी छ ।’