राष्ट्रिय स्वतन्त्र पार्टीका अध्यक्ष रवि लामिछानेलाई डेंगुको संक्रमण देखिएको छ । सञ्चारकर्म छाडेर राजनीतिमा होमिएका उनी पछिल्लो समय संगठन विस्तारका क्रममा देश दौडाहामा रहेका छन् । देश दौडाहामा रहेकै बेला आफूलाई डेंगुको संक्रमण देखिएको उनले सामाजिक सञ्जालमार्फत जानकारी दिएका छन् । 

डेंगु संक्रमणका कारण विभिन्न जिल्लामा तय भएको पार्टीको कार्यक्रममा सहभागी हुन नसकेको रविले जानकारी दिएका छन् । उनले सन्देशमा लेखेका छन्, ‘हिजोदेखि ज्वरो र शरीर दुखाईका लक्षण देखिन थालेको थियो । परीक्षण गराउँदा डेंगी देखियो । डाक्टरको सल्लाहअनुसार केहीदिन आराम गर्नु पर्ने भएकाले भरतपुर, तनहु, लम्जुङ, गोर्खालगायतका कार्यक्रमहरूमा सहभागी हुन नसकिने कुराको जानकारी गराउँदछु । यसबाट पर्न जाने असहजता प्रति क्षमाप्रार्थी छु ।’ 

रविको पार्टी पहिलोपटक निर्वाचनमा सहभागी हुँदैछ । आगामी मंसिर ४ गते हुने प्रतिनिधि सभा र प्रदेश सभाको निर्वाचनमा भाग लिन लागेको स्वतन्त्र पार्टी संगठन निर्माणमा तीव्रताका साथ लागिरहेको छ । अध्यक्ष रवि आफै अधिकांश कार्यक्रममा सहभागी हुन पुगिरहेका छन् ।